SQO-da halyqty jumyspen qamtý ortalyǵynyń dırektory sottaldy
Petropavl qalalyq sotynyń málimetinshe, oblys ortalyǵyndaǵy halyqty jumyspen qamtý ortalyǵynyń dırektory senimdi adamdary arqyly birneshe ret para alǵan.
Sottalýshy, halyqty jumyspen qamtý ortalyǵynyń dırektory memlekettik baǵdarlamany júzege asyrý barysynda, sybaılastary arqyly jeke tulǵalardan olarǵa jalǵa beriletin páterlerdi bergeni úshin syıaqy alyp kelgen.
Prokýror sottalýshyny tıisti organdarda qyzmet atqarý quqyǵynan ómir boıyna aıyra otyryp, 10 jylǵa bas bostandyǵynan aıyrýǵa, onyń sybaılastaryna da 10 jylǵa bas bostandyǵynan aıyrý túrindegi jaza taǵaıyndaýdy surady.
Sottalýshylar kinálaryn moıyndamady jáne olar óz áreketterinde qylmystyq quqyq buzýshylyqtyń bolmaǵany úshin aqtaýdy surady.
«Birneshe ret úlken mólsherde para alǵandarǵa aıyppul nemese 7 jyldan 12 jylǵa deıingi merzimge bas bostandyǵynan aıyrý túrindegi jaza qarastyrylǵan. Sottalýshylar buryn isti bolmaǵan, bul olardyń jazasyn jeńildetetin jaǵdaı retinde alyndy. Sondaı-aq, sybaılas retinde jaýapqa tartylǵandardyń birinde jas balasy bar. Osynyń bárin negizge ala otyra sot jumyspen qamtý ortalyǵynyń eks-dırektoryn 8 jylǵa bas bostandyǵynan jáne ómir boıyna memlekettik qyzmette qyzmet atqarý quqyǵynan aıyrdy. Al onyń sybaılastaryna 7 jylǵa bas bostandyǵynan aıyrý jazasy kesildi. Olardyń árqaısysy jazasyn ortasha qaýipsizdik mekemesinde ótep, 5 jylǵa memlekettik qyzmette qyzmet atqarý quqyǵynan aıyryldy», - delingen Petropavl qalalyq soty taratqan habarlamada.
Esterińizge sala keteıik, ótken jyldyń sáýir aıynda sybaılas jemqorlyqqa qarsy qyzmet memlekettik baǵdarlama aıasynda jastarǵa tegin berilýi tıis páterlerdi basqalarǵa usynyp, sol úshin para aldy degen kúdikpen jumyspen qamtý ortalyǵynyń qyzmetkerlerin ustaǵan edi.