SQO-da halyqaralyq órt-taktıkalyq oqý jattyǵýlary ótti
SQO Qyzyljar aýdany Vagýlıno eldi mekeni mańynda bolǵan órt-taktıkalyq oqý jattyǵýlaryna júzge jýyq adam jáne 25 tehnıka jumyldyryldy. Stsenarıı boıynsha eki el órt sóndirýshileri dala jáne orman órtin sóndirdi.
«Reseımen ormandy dala shekarasynyń jalpy uzyndyǵy 1200 shaqyrymnan asady. Aramyzdaǵy ózara qarym-qatynas shekara mańy yntymaqtastyǵy forýmy aıasynda eki memleket basshylary qol qoıǵan qujattyń negizinde júzege asyrylady», - deıdi SQO tótenshe jaǵdaılar departamentiniń bastyǵy Ramıl Kamalov.
Shekaralas aýmaqtarda órt jıi shyqpaǵanymen, asa qaýipti. Ormandy dalaǵa órt tıse, des bermeı ketýi múmkin. Mundaıda eki jaq kúsh biriktirý arqyly tilsiz jaýmen kúrese alady. Búgingi oqý jattyǵýlarynyń maqsaty – qutqarýshylardyń deńgeıin baǵamdap, tájirıbe almasý.
«Búginde eki elde dala jáne orman órtiniń paıda bolý qaýpi joǵary. Sol sebepti mundaı oqý-jattyǵý mamandarymyzǵa ózara tájirıbe almasyp, jalynmen kúresý kezinde qoldanylatyn zamanaýı ádis-tásildermen bólisý múmkindigin beredi. Kórshi bolǵandyqtan qarym-qatynasymyz jaqsy, sondyqtan kez-kelgen ýaqytta bir-birimizge kómek qolyn sozýǵa daıynbyz», - deıdi Túmen oblysy boıynsha RF Tótenshe jaǵdaılar mınıstrliginiń bas basqarma basshysy Artýr Hachatrıan.
SQO-da jyl basynan beri 24 orman órti tirkeldi. Bul ótken jyldyń uqsas kezeńimen salystyrǵanda 60 %-ǵa kóp. Dala órti de jıilegen. Byltyr 34 oqıǵa tirkelse, bıyl mamandar 45 ret shaqyrtýǵa barǵan.
