SQO-da Halyqaralyq áıelder kúni qarsańynda polıtsııa ardagerleri marapattaldy
PETROPAVL. QazAqparat – Soltústik Qazaqstan oblysynda polıtsııa departamenti 8 naýryz merekesi qarsańynda tálimger ardagerlerin quttyqtady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, polıtsııa vedomstvosynda 120 zeınetker áıel esepte tur. Olardyń árqaısysyna Halyqaralyq áıelder kúni merekesi qarsańynda Ardagerler keńesinen syıaqy berilip, quttyqtaý aıtylady. Olarǵa jalpy somasy 1,5 mln teńge syıaqy berilmek. Soǵys ardagerleriniń 3 jesiri men 7 tyl eńbekkeri de erekshe qurmetke ıe bolady.
Polıtsııa departamentinde polıtsııa ardagerleri men pogon taqqan qyz-kelinshekterdiń qurmetine jyl saıynǵy dástúr boıynsha merekelik is-shara ótti. Ardagerler esimderi merekelik buıryqqa da engizildi. Roza Plamadıala, Kúlbaram Bákenova, Olga Shmatchenko «Qajyrly eńbegi men jeke úlesi úshin», Tamara Anıkına, Valentına Okýneva, Valentına Pahota «Qoldaýshy» medaldaryn aldy. Zeınetkerler demalysqa shyqsa da belsendi ómir saltyn ustanady. Vedomstvonyń barlyq is-sharalaryna qatysady. Bes ardager óz bólinisterinde tálimger retinde qyzmetterin jalǵastyrýda.
Solardyń biri - otstavkadaǵy polıtsııa podpolkovnıgi Kúlbaram Bákenova. Otyz jyldyq eńbek ótili bar tergeýshi 2015 jyldan bastap qurmetti demalysta. Ol bir jyldan soń Petropavl qalasy polıtsııa basqarmasyndaǵy tergeý bólimine aǵa nusqaýshy bolyp oraldy. Sodan beri 4 jyl boıy jas mamandardy tergeýshi mamandyǵynyń qyr-syryna úıretip keledi. Budan bólek, Kúlbaram Sheriqyzy dınamolyq qozǵalystyń barlyq sport is-sharalarynda ardagerler namysyn qorǵap, departamenttiń basqa da qoǵamdyq mańyzǵa ıe is-sharalaryn qalt jibermeıdi.
SQO Іshki ister organdary jáne Ulttyq ulan ardagerler keńesiniń tóraǵasy Suraǵan Kópeevtiń aıtýynsha, mundaı qasıet polıtsııanyń barlyq áıel ardagerlerine tán.
«Qyzmet atqarǵan jyldary kóp ýaqytyn jumysta ótkizýge úırengen, ujymdaryna ábden baýyr basyp qalǵan ofıtser áıelderimiz ózderiniń bólinisterimen únemi baılanysta. Olarǵa keńesterin aıtyp, qyzmetti minsiz, ári sapaly atqarýǵa úıretedi», - deıdi Suraǵan Kópeev.
