SQO-da halyq sanaǵyn júrgizýge myńǵa jýyq adam tartylmaq
PETROPAVL. QazAqparat - Soltústik Qazaqstan oblysynda bıylǵy halyq sanaǵyn júrgizýge 968 adam jumyldyrylady. Onyń qataryna 30 ýákil, 811 sanaq júrgizýshi-ıntervıýer jáne 124 baqylaýshy-nusqaýshy qabyldanady, dep habarlaıdy QazAqparat tilshisi.
SQO Statıstıka departamenti qazir kartografııalyq materıaldardy naqtylap jatyr. Mamandardyń aıtýynsha, bıylǵy halyq sanaǵy eki ádispen júrgizilmek. Turǵyndar ınternet jelisin qoldanyp, sanaq paraǵyn onlaın tártiptemede ózdiginen toltyrady nemese arnaıy daıarlyqtan ótken ıntervıýerler úı-úıdi aralap, derek jınap, málimetterdi planshetke engizedi. Osy maqsatqa arnaıy «SANAQ - 2019» veb-saıty qurylmaq.
Respondent ózdiginen sanaq paraǵyn toltyrý úshin saıtqa tirkelýi qajet. Ol úshin JSN-di, jeke bas kýáliginiń nómirin, mobıldi telefon nómirin jáne kod pen qupııasózdi engizýi kerek. Kod habarlama arqyly saıtta kórsetilgen telefon nómirine keledi. Respondentter halyq sanaǵynan onlaın ótpegen jaǵdaıda , ıntervıýer olardy úıdi-úıge júrip sanaqtan ótkizýge mindetti.
Jalpyulttyq halyq sanaǵyn júrgizýge respýblıkalyq qazynadan 8,8 mlrd teńge bólingen. On jylda bir ret ótetin mańyzdy naýqan qazannyń 16-sy men qarashanyń 15-i aralyǵynda ótpek. Ázirshe sanaq paraǵyna qansha jáne qandaı suraqtar enetini bekitilmegen.
2009 jylǵy halyq sanaǵynyń qorytyndysy boıynsha SQO-ndaǵy turǵyndar sany 596 myń 535 adamdy quraǵan bolatyn. Onyń 237 myńy qalada tursa, qalǵany aýyldyq jerlerdi mekendeıdi. Sondaı-aq áıelderdiń er adamdardan shamamen 30 myńǵa artyqtyǵy anyqtaldy.
