SQO-da halyqtyń kórshi elderge kóshý toqtamaı tur – Máýlen Áshimbaev

ASTANA. KAZINFORM – Senat tóraǵasy Máýlen Áshimbaev Jumysshy mamandyqtar jylyna arnalǵan parlamenttik talqylaýda Soltústik Qazaqstan oblysyndaǵy demografııalyq jaǵdaıǵa alańdaıtynyn bildirdi.

— Bul – salmaqty problema. Bir ǵana Soltústik Qazaqstanda halyqtyń kóship ketýi toqtamaı tur. Sáıkesinshe turǵyndar sany azaıyp jatyr. Onyń tabıǵı faktory da. Odan bólek jastardyń keıbir kórshi elderge kóship ketýi bar. Birinshi oqýǵa túsedi, keıin sol jaqqa jumysqa shaqyrady. Shyǵys Qazaqstan, Pavlodar oblystarynda da osyǵan uqsas tendentsııa bar dep oılaımyn. Kóp el jas mamandardy ózine tartýǵa múddeli. Óz mamandarymyzdy ózimizde qaldyrý negizgi mindet bolýy kerek, - dedi Senat spıkeri. 

Sondaı-aq ońtústikten soltústikke baǵyttalǵan eńbek mıgratsııasyn qoldaýdyń tetikterin qaıta qaraý kerektigin aıtty. 

— Ońtústiktegi artyq jumys kúshin soltústiktegi eńbek kúshi tapshy óńirlerge kóshirý baǵdarlamasyn qaıta qaraý kerek shyǵar. Buǵan deıingi baǵdarlamalar tıimsiz bolyp shyqty. Kelgende adamdar qaıta kóship ketip jatty nemese sonshalyq bir qyzyǵýshylyq bolǵan joq. Tipti belgili bir jemqorlyq máseleleri, qarjyny tıimsiz ıgerý sátteri boldy. Solaı boldy eken dep ol baǵdarlamalardan múlde bas tartýǵa da bolmaıdy. Qaıta qarap, keıbir tusyn qysqartyp, jańa baǵdarlamany osyǵan deıin qatelikterdi eskerip, bárimiz birge aqyldasa otyryp bekitý kerek shyǵar, - dedi Máýlen Áshimbaev. 

Atalǵan jıynda ol óndiristegi tótenshe oqıǵalardyń 44 paıyzy Qaraǵandy, Ulytaý jáne Shyǵys Qazaqstan oblystarynda tirkeletinin aıtty.