SQO-da halyq arasyndaǵy ólimniń negizgi sebebi aıtyldy

PETROPAVL. KAZINFORM – Soltústik Qazaqstan oblysynda alǵashqy toqsanda 1081 náreste týsa, 1542 adam qaıtys boldy.

Jalpy qazir halyq sany SQO-da shamamen 520 myń shamasynda. Ulttyq statıstıka bıýrosynyń SQO boıynsha departamentiniń málimetinshe, dúnıege kelgenderdiń 576-sy – ul, al 505 – qyz bala. Nárestelerdiń 439-y nemese 40,6%-y oblys ortalyǵynda týdy. Bul Petropavlda týý belsendiliginiń joǵary ekenin kórsetedi.

Aýdandar arasynda eń joǵary týý koeffıtsıenti Ýálıhanov aýdanynda tirkelgen, keıingi orynda Aqjar aýdany keledi. Al eń tómengi týý deńgeıi M.Jumabaev aýdanynda, Qyzyljar aýdanynda, sondaı-aq Mamlıýt jáne Esil aýdandarynda.

Óńirdegi jalpy ólim deńgeıi áli de joǵary, alǵashqy úsh aıda oblysta 1542 adam qaıtys boldy.

Halyq arasynda ólimniń negizgi sebepteri: qan aınalymy júıesiniń aýrýlary – 18%, júıke júıesiniń aýrýlary – 17%, tynys alý organdarynyń aýrýlary – 14%, jańa óskinder (isikter) – 11%, as qorytý organdarynyń aýrýlary – 10%, jazataıym oqıǵalar, ýlaný men jaraqattaný – 5%.

Osy aralyqta oblys boıynsha 591 jup nekege turdy. Sonymen qatar azamattyq hal aktilerin tirkeý organdarynyń derekteri boıynsha 349 ajyrasý deregi tirkelgen.

Buǵan deıin Petropavlda er adamnyń ústine benzın tógilip, tirideı janyp kete jazdaǵanyn jazǵan edik.