SQO-da habarsyz ketken 47 jastaǵy er adam tabyldy
PETROPAVL. QazAqparat – Soltústik Qazaqstan oblysynda polıtseıler jyl basynan beri iz-túzsiz joǵalǵan 474 adamdy izdep tapty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Taıynsha aýdanynda polıtsııa qyzmetkerleri men jergilikti turǵyndar 47 jastaǵy aýyl turǵynyn birneshe kún boıy izdedi. Ol jalǵyzbasty, uıaly telefony bolmaǵan. Ári qatty aıazda adasyp, úsip kete me degen qaýip te alańdatty.
Jedel ýákilder men ýchaskelik polıtsııa ınspektorlary keń aýqymdy izdeý sharalaryn qolǵa aldy. Jergilikti atqarýshy organdardyń kómegimen izdeý jumystaryna salt atty jergilikti turǵyndar qosyldy. Áldebireýlerdiń er adamdy shalǵaı ornalasqan aýyldarda kórgeni týraly aqparat paıda bolyp, izdeýshilerge úmit berdi. Іzdestirý aýmaǵyn keńeıtýdiń arqasynda joǵalǵan adam Aqmola oblysynan tabyldy. Ol týystaryna aıtpaı nápaqa tabý maqsatymen ketip qalǵan eken.
«Mundaı oqıǵalar jıi kezdesedi. Josparlaryńyz týraly jaqyndaryńyz ben týystaryńyzdy eskertińizder. Baılanys quraldaryn da ózińizben alyp júrgen jón.
Oblysta 11 aıda polıtsııa qyzmetkerleri iz-tússiz joǵalǵandar týraly 479 aryzdy qabyldady. Іzdeý sharalaryna barlyq qolda bar kúsh jumyldyrylady. Buǵan volonterler de belsendi qatysady. Joǵalǵandardyń kópshiligi kezekshi táýlikte tabyldy. Tek 28 adamǵa qatysty izdestirý isi qozǵaldy. Búginde olardyń 23-iniń júrgen jeri anyqtaldy», - deıdi SQO PD Krımınaldyq polıtsııa basqarmasy bastyǵynyń mindetin atqarýshy Madııar Harıpov.
