SQO-da habar-osharsyz ketken kásiporyn kúzetshisi 5 kúnnen beri izdeýde
PETROPAVL. QazAqparat – Soltústik Qazaqstan oblysynda bes kúnnen beri 29 jastaǵy Vıtalıı Maısner tabylmaı jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Jambyl aýdanynyń 29 jastaǵy turǵyny Vıtalıı Vıacheslavovıch Maısner 16 tamyzdan beri joq. Jigit Qaırankól eldi mekenindegi aýyl sharýashylyǵy kásiporyndardyń birinde kúzetshi bolyp jumys istegen. Ol jumys ornynan, ıaǵnı daladaǵy qostan shyǵyp, habarsyz ketken. Er adamnyń joǵalǵany týraly polıtsııaǵa jumys berýshi habarlaǵan.
Vıtalıı Maısnerdi izdeýge polıtseıler, qutqarýshylar men volonterler, barlyǵy 60-tan astam adam jumyldyryldy. Áleýmettik jelide joǵalǵan jigit jaıynda aqparat ta taratyldy, alaıda ázirge nátıje joq.
Vıtalıı orta boıly, dene bitimi ortashalaý kelgen, shashy sary. Ústinde qara kúrteshe men qara shalbar bolǵan.
Іz-túzsiz joǵalǵan adam týraly qandaı da bir aqparat bolǵan jaǵdaıda, polıtseıler 8-777-307-99-65, 8-775-202-00-37 nómiri boıynsha nemese «102» arnasyna habarlasýdy suraıdy.
Jyl basynan SQO polıtseıleri iz-túzsiz joǵalyp ketkender týraly 309 ótinish qabyldady. Onyń ishinde 303 adamnyń júrgen jeri anyqtaldy.
Buǵan deıin Petropavldyń 13 jastaǵy turǵyny Danıl Loskovtyń joǵalǵanyn habarlaǵan edik. Jasóspirim aman-esen tabyldy.
