SQO-da «gonkong tumaýyn» juqtyrýdyń 124 deregi tirkeldi

PETROPAVL. KAZINFORM – Soltústik Qazaqstan oblysynda ótken aptamen salystyrǵanda JRVI-men aýyrý 61% tómendedi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, sońǵy jeti kún ishinde JRVI-di juqtyrýdyń 3 647 jaǵdaıy tirkelgen, bul onyń aldyndaǵy aptadan 1,6 ese tómen. Shekteý sharalary, profılaktıkalyq jumystar jáne halyqtyń saqtyqqa mán berýi óz nátıjesin berip jatyr. 

- Jalpy bıylǵy epıdemıologııalyq maýsymda oblys boıynsha 30 myńǵa jýyq adam JRVI-men aýyrdy. Syrqattaný deńgeıi ótken jyldyń kórsetkishimen birdeı, ıaǵnı aıtarlyqtaı ósim joq.

Balalar arasyndaǵy aýrýshańdyq basym. JRVI juqtyrǵandardyń 68% nemese 20 myńnan astamy 14 jasqa deıingi bala. Bul jylda qaıtalanatyn jaǵdaı, sebebi, balalar vırýstyq ınfektsııalarǵa áldeqaıda sezimtal keledi, - deıdi sanıtar dárigerler.

Qarasha aıynyń basynda óńirde tumaýdy juqtyrýdyń alǵashqy deregi anyqtalsa, qazir aýyrǵandar sany 124-ke jetti. Oblys aýmaǵynda A/H3N2, ıaǵnı «gonkong tumaýy» taraǵan. 

- Tumaý negizinen eresekter arasynda taraǵan, 100 adam aýyrdy, balalardyń 24-i juqtyrǵan.

Tumaýǵa jatpaıtyn vırýstardyń da tsırkýlıatsııasy júrip jatyr. Onyń ishinde rınovırýsty juqtyrýdyń 19 jaǵdaıy tirkeldi. 6 adamǵa – bokavırýs, 4 adamǵa adenovırýs dıagnozy qoıyldy, - deıdi mamandar.

Sanıtar dárigerler tumaýǵa qarsy vaktsınatsııadan bólek, aýrýdyń aldyn alý sharalaryn saqtaýǵa keńes beredi, onyń ishinde adamdar kóp jınalatyn oryndarǵa barýdy shekteý, maska kııý, qoldy jıi jýý, ımmýnıtetti nyǵaıtý bar. 

Buǵan deıin SQO-da 108 synyptyń oqýshylary JRVI-ge baılanysty onlaın oqyp jatqanyn jazǵan edik.