SQO-da «gonkong tumaýyn» juqtyrǵandar sany kóbeıip barady

PETROPAVL. KAZINFORM — Soltústik Qazaqstan oblysynda birer kúnde 10 adam tumaýratyp, dáriger kómegine júgindi.

SQO sanıtarııalyq-epıdemıologııalyq baqylaý departamenti brıfıng ótkizip, óńirdegi epıdjaǵdaıǵa toqtaldy. Vedomstvo basshysynyń orynbasary Arman Kúshbasovtyń aıtýynsha, oblysta tumaýdy juqtyrýdyń alǵashqy deregi 7 qarashada tirkelgen. 

— A H3N2 túri, ıaǵnı «gonkong tumaýy» ekeni rastaldy. Sonyń ishinde syrqattanǵandardyń jeteýi — bala. Budan bólek, oblysta tumaýǵa jatpaıtyn vırýstar da anyqtalyp jatyr. Alty adam rınovırýspen, eki adam adenovırýspen aýyrdy, — deıdi Arman Kúshbasov.

Jalpy, epıdmaýsym bastalǵaly SQO-da 14 myńǵa jýyq adam jiti respıratorlyq vırýstyq ınfektsııalar juqtyrǵan. Bul ótken jyldyń uqsas kezeńimen salystyrǵanda 24,5% az. Syrqattanǵandardyń 9,4 myńy nemese 67% — 14 jasqa deıingi balalar.

— Ótken aptada 2,1 myń adam aýyrdy. Bul aldyńǵy aptamen salystyrǵanda 22% az. Aldyńǵy aptada 2,8 myńǵa jýyq turǵyn JRVI juqtyrdy. 23 qyrkúıekten bastap oblysta tumaýǵa qarsy vaktsınatsııa úrip jatyr. Óńirge «Grıppol plıýs» vaktsınasynyń 60 myń dozasy satyp alynǵan. Búgingi tańda 58,5 myń adam egildi, — deıdi Kúshbasov.

Buǵan deıin ShQO-da da «gonkong tumaýyn» juqtyrý jaǵdaılary anyqtalǵanyn jazǵan edik.

Mamandar tumaýdan saqtaný joldary jaıynda keńes berdi.