SQO-da gaz tasymaldaıtyn júk kóligi aýdaryldy
PETROPAVL. QazAqparat – Soltústik Qazaqstan oblysynda avtotsısternasynda 17 tonna gazy bar avtokólik aýdaryldy. Adam shyǵyny joq, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, oqıǵa keshe 29 jeltoqsan kúni keshki saǵat 18.33-te Qyzyljar aýdanynyń aýmaǵynda bolǵan. «Chelıabi-Novosibir» M-51 avtojolynyń 506-shaqyrymynda gaz tasymaldaıtyn «Mersedes» avtomashınasynyń júrgizýshisi rólge ıe bola almaı, joldan shyǵyp ketken. Osylaısha, kólikti jyraǵa aýdaryp alǵan. Avtomashına Reseı Federatsııasynyń Ekaterınbýrg qalasynan Nur-Sultan qalasyna baǵyt alǵan eken. Mamandardyń aıtýynsha, avtotsısternaǵa zaqym kelgen joq. Kólik júrgizýshisi de din-aman.
Tótenshe jaǵdaıdyń aldyn alý maqsatynda polıtseıler qaýipti aımaqty qorshaýǵa aldy. Tótenshe jaǵdaı departamentiniń mamandarynan kezekshilik qoıyldy. Qazir oqıǵa ornynda jeke quramnan 8 adam, 2 tehnıka júr. Sondaı-aq medıtsınalyq qyzmetkerler de kezekshilik etýde.
Oqys oqıǵa kólik qozǵalysyna kedergi keltirgen joq. Kún shyqqan soń avtotsısternadaǵy gaz quıyp alynbaq.
