SQO-da gaz tasymaldaýshy kólik jarylyp, 8 adam kúıik aldy
ASTANA. KAZINFORM — 25 maýsymda Soltústik Qazaqstan oblysy Taıynsha aýdany Ilıchevka aýylyndaǵy «Taıynsha maı» JShS aýmaǵynda suıytylǵan gazdy tasymaldaǵan avtokólik órtengen, dep habarlaıdy SQO TJD baspasóz qyzmeti.
Aldyn ala aqparat boıynsha janarmaı quıý kezinde gazgolderdiń shlangisi úzilip, gaz tasyǵysh mashına, keıinen jerasty rezervýar tireýish armatýrasy jandy.
Oqıǵa ornyna Soltústik Qazaqstan oblysy TJD kúshteri men quraldary, sondaı-aq Aqmola oblysynan qutqarýshylar jedel keldi. Kúsh-jigerdi úılestirý úshin óńiraralyq ózara is-qımyl jospary iske qosyldy.
— Oqıǵa saldarynan 8 adam túrli dárejedegi kúıik alyp, Kókshetaý qalasynyń oblystyq aýrýhanasyna jetkizildi. Dárigerlerdiń qaraýynan keıin bir adam úıine jiberildi. Qutqarýshylardyń jedel, úılesimdi jáne kásibı is-qımyldarynyń arqasynda 50 sh. m. alańda órt saǵat 20.57-de tolyǵymen sóndirildi, — delingen habarlamada.
Órtti sóndirýge jeke quramnan 80 adam jáne 20 tehnıka, onyń ishinde Soltústik Qazaqstan jáne Aqmola oblystarynyń TJD, sondaı-aq Taıynsha aýdandyq sharýashylyq júrgizý obektileriniń órt sóndirý beketteri men memlekettik emes órtke qarsy qyzmet bólimsheleri jumyldyryldy.
Órttiń sebepteri anyqtalyp jatyr. Oqıǵa faktisi boıynsha SQO TJD sotqa deıingi tergeý júrgizilýde.
Budan buryn Atyraýda qamys órtinen aýanyń lastanýyna qatysty tekseris bastalǵanyn jazdyq.