SQO-da ǵalym Wi-Fi arqyly júrek aýrýlaryn dıagnostıkalaýdy jeńildetetin apparat oılap tapty
PETROPAVL. KAZINFORM — Qozybaev ýnıversıtetiniń Injenerııa jáne sandyq tehnologııalar fakýltetiniń PhD doktory, zertteýshi Saıat Moldahmetov tehnologııasyn qoldaný arqyly bıomedıtsınalyq sıgnaldardy qabyldaý jáne taratýǵa arnalǵan apparattyq-baǵdarlamalyq Wi-Fi ınterfeısin ázirlep jatyr. Bul týraly Ǵylym jáne joǵary bilim mınıstrliginiń baspasóz qyzmeti málim etti.
Joba dárigerlerdiń júrek-qan tamyrlary aýrýlaryn dıagnostıkalaý jumysyn jeńildetýge baǵyttalǵan.
Jas ǵalym ǵylymı qyzmetpen belsendi aınalysyp keledi. Saıat Moldahmetov ǵylym salasynda 20 jyl boıy eńbek etip keledi. 2018-2020 jyldary «Elektrokardıodıagnostıkanyń symsyz avtomattandyrylǵan júıesin ázirleý» atty granttyq jobanyń múshesi boldy. Sonymen qatar memlekettik ǵylymı stıpendııalardyń ıegeri atandy.
Ǵalym sondaı-aq kópdeńgeıli qýat ınvertorynyń qýatyn arttyrý ádisterin ázirleý jobasyna jetekshilik etti. Atalǵan jobaǵa 18 mıllıon teńgeden astam kólemde granttyq qarjylandyrý bólindi.
— Zertteýshiniń 30-dan astam ǵylymı jarııalanymy bar, onyń ishinde Scopus derekqoryna engen, ımpakt-faktory bar halyqaralyq jýrnaldarda jarııalanǵan 13 maqalasy bar. Saıat Moldahmetov tórt ónertabys patentiniń, tórt paıdaly model patentiniń jáne eki monografııanyń avtory, — delingen habarlamada.
Ol ǵylymı zertteýlerin Polshadaǵy Lıýblın tehnıkalyq ýnıversıtetinde jáne Fınlıandııadaǵy Shyǵys Fınlıandııa ýnıversıtetinde ótken halyqaralyq ǵylymı taǵylymdamalar aıasynda júrgizdi.
Eske sala keteıik, buǵan deıin «Qazaqstan ınjınırıng» R& D ortalyǵy 2020 jyldan beri ártúrli maqsattaǵy ushý apparattaryn ázirleýmen aınalysyp kele jatqanyn jazdyq. Atalǵan tehnologııalar áýe, sý, sýasty jáne jer ústi keńistikterinde barlaý jáne baqylaý jumystaryn júrgizýge, aýyl sharýashylyǵy men áskerı salada qoldanýǵa arnalǵan.
