SQO-da fýtbol maýsymynyń úzdik oıynshysy anyqtaldy
PETROPAVL. QazAqparat - Soltústik Qazaqstan oblysynyń ákimi Erik Sultanov ótken fýtbol maýsymynyń qorytyndysy boıynsha «Qyzyljar SK» komandasyn quttyqtap, úzdik oıynshylardy marapattady, dep habarlaıdy «QazAqparat» HAA tilshisi.
Úzdik qaqpashy bolyp Tımýrbek Zakırov, úzdik qorǵaýshy - Nemanıa Vıdıch, úzdik jartylaı qorǵaýshy - Aslan Januzaqov, úzdik shabýylshy bolyp Boshko Stýpıch atandy.
Tájirıbeli jartylaı qorǵaýshy Álı Álıev maýsymnyń úzdik oıynshysy atandy. 2016 jylǵy maýsymda ol 15 oıyn ótkizdi.
Birinshi lıga komandalary arasynda respýblıka birinshiliginiń qola júldegeri atanǵan klýbty ulyqtaý saltanaty óńir basshysynyń quttyqtaý sózimen bastaldy. Erik Sultanov Soltústik Qazaqstan oblysyndaǵy fýtbol jáne hokkeı birte birte jandanyp kele jatqanyn aıtty.
«Qyzyljar SK» FK prezıdenti Grıgorıı Lorııa oblys basshylyǵy komandaǵa jaqsy demeý kórsetip otyrǵanyn, sonymen birge jankúıerlerdiń qoldaýy sapaly oıyn kórsetý úshin jiger berip otyrǵanyn aıtty.
Komanda kapıtany Evgenıı Averchenko oblys ákimine qola medaldi tapsyrdy jáne kelesi jyly QR Birinshiliginiń «altynyn» syılaýǵa ýáde berdi.
Sońǵy eki jylda SQO-da 263 fýtbol jáne shaǵyn fýtbol alańy, onyń ishinde 46 jasandy jabyny bar zamanaýı alańdar turǵyzyldy. «Qarasaı» stadıonynyń kúrdeli jóndeýi júrgizilýde, «Qarasaı» stadıonynda metall-tenttik fýtbol manejiniń qurylysy bastaldy.
Bıylǵy jyly jastar fýtbol ortalyǵy ashyldy. Oblystyń balalar-jasóspirimder sport mektepteriniń 140 shákirti tálim alyp júr. Olar fýtboldan QR Birinshiliginde segiz jas sanaty boıynsha jastar komandalarynyń arasynda óner kórsetedi. Qazanda olar «Jas-Qyran» lıgasynyń balalar-jasóspirimder arasyndaǵy Qazaqstan birinshiliginiń kúmis medalin jeńip aldy.
