SQO-da fotoǵa túspek bolǵan boıjetken bıiktigi 30 m jardan qulady

PETROPAVL. QazAqparat – Petropavlda fotoǵa túspek bolǵan boıjetken jardan qulap ketti. Álsirep jatqan ony polıtseıler men qutqarýshylar zembilmen joǵary kóterip shyǵardy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Zarechnyı kentiniń turǵyny Esil ózeniniń qarama-qarsy jaǵasynda jatqan adamdy baıqap qalyp, bul týraly «102» arnasyna habarlaǵan. Aqparat jaqyn mańda patrýlde júrgen Petropavl qalalyq polıtsııa basqarmasy patrýldik polıtsııa batalonynyń ınspektory Erik Jetibaev pen aǵa ınspektor Tólegen Aldabergenovke berilgen. Oqıǵa ornyna kelgen polıtseılerge adam jatqan orynǵa aparatyn joldy arǵy jaǵada júrgen qala turǵyny aıtyp otyrdy.

«Birneshe mınýt ishinde bıiktigi 30 metr bolatyn jardan ózen jaǵasyna tústik. Jaǵada jatqan adam qyz bala eken. Jardan domalap túsken ol balshyqqa malynyp, álsirep qalypty. Qatty tońyp qalmas úshin oǵan syrt kıimimizdi jaýyp, orap, joǵaryǵa kóterýge tyrystyq. Alaı da jaǵadaǵy balshyq aıaq attatpady. Ratsııa arqyly Jedel basqarý ortalyǵyna jaǵdaıdy baıandap, qutqarýshylar men jedel járdem jiberýdi suradyq», - deıdi Tólegen Aldabergenov.

Qutqarýshylar men polıtseıler ony arnaıy zembilge salyp, jar ústine qaýipsiz jerge alyp shyqty. Bul kezde medıtsına qyzmetkerleri de kelip, qajetti kómek kórsetti.

18 jastaǵy boıjetken Jeńis saıabaǵy aýdanynda jardan qulap ketken. Aıtýynsha, fotoǵa túspek bolypty. Abyroı bolǵanda, qyz aman-esen.