SQO-da fermerlik qojalyqtardyń birinen saýatsyz ári qujatsyz balaly áıel tabyldy
PETROPAVL. QazAqparat – Soltústik Qazaqstan oblysyndaǵy sharýashylyqtardyń birinen qujaty joq, saýatsyz áıel men onyń 8 jasar qyzy tabyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 10-12 qyrkúıek aralyǵynda óńir polıtseıleri «STOP trafık» jedel-profılaktıkalyq is-sharasy aıasynda jumys júrgizdi.
«Іs-sharanyń maqsaty - adam saýdasymen baılanysty qylmystardy ashý jáne jolyn kesý. Tártip saqshylary monsha, qonaq úı keshenderin, oıyn- saýyq oryndaryn, qurylystardy, sharýashylyqtardy jáne basqa da nysandardy tekserdi. Jumysqa oblystyq ákimdiktiń mamandary, qoǵamdyq birlestikter ókilderi jáne volonterler tartyldy», - deıdi polıtseıler.
Osyndaı tekserý barysynda oblystaǵy fermerlik qojalyqtardyń birinde tártip saqshylary 8 jasar balasymen 1988 jyly týǵan áıeldi anyqtady.
Anasy da, qyzy da qujatsyz, saýattary joq. Áıel sóılesýden bas tartqan, alaıda áıelderdi qoldaý ortalyǵy qyzmetkerleri ony turmystyq zorlyq- zombylyq qurbandaryna arnalǵan ortalyqqa júginýge kóndirdi.
«Qyz bala mektepke barmaǵan, ortalyqta alǵash ret oıynshyqtarmen oınady. Qazirgi ýaqytta qyzǵa jáne anasyna medıtsınalyq, psıhologııalyq jáne quqyqtyq kómek kórsetilýde. Áıeldiń aıtýynsha, ol – Ońtústik Qazaqstannyń týmasy eken. Qujat jasaý úshin tulǵany rastaý rásimi júrgizilýde. Habarlama Qazaqstannyń daǵdarys ortalyqtarynyń odaǵy adam
saýdasyna qarsy kúres jónindegi 116-16 tikeleı jelisine kelip túsken, keıin aýmaqtylyǵy boıynsha SQO polıtsııasyna jiberildi», -deıdi SQO polıtsııa departamenti Krımınaldyq polıtsııa basqarmasynyń bastyǵy Petr Klımov.
Jedel-profılaktıkalyq is-sharasynyń eki kúninde oblys boıynsha jeńgetaılyqtyń bir faktisi, «Qoǵamdyq oryndarda tıisý» boıynsha 3 fakti anyqtaldy. Esepke 16 áıel qoıyldy, onyń bireýi Qyrǵyz Respýblıkasynyń azamatshasy.
