SQO-da fermerlerge mal azyǵyn durys daıyndaýdy úıretip jatyr
PETROPAVL. KAZINFORM – Soltústik Qazaqstan oblysynda mal sharýashylyǵymen aınalysatyn fermerlerdiń biliktiligin arttyrý kýrstary ótip jatyr.
Semınardy uıymdastyrýshy - Soltústik Qazaqstan aýyl sharýashylyǵy ǵylymı zertteý ınstıtýty. Іs-sharaǵa óńirdiń 40-qa jýyq mamany qatysýǵa nıet bildirgen.
- SQO-da sońǵy jyldary sútti baǵyttaǵy mal sharýashylyǵy damyp keledi. Óńirge shetelden mal ákelinip jatyr, bul maldyń áleýeti joǵary, biraq biz sony tolyq paıdalana almaı otyrmyz. Máselen kópshilik bul sıyrlar 20-25 lıtr sút beredi dep oılaıdy, biraq olar 40 lıtrge deıin bere alady. Ondaı sút alý úshin beretin jem-shóbimizdi durystaý qajet.
Jemazyqqa paıdalanýǵa bolatyn túrli shóp bar, shetten de ákelip, tuqymyn satyp jatyr. Biraq biz onyń ishinen qajettisin, sapalysyn tańdaı bilýimiz kerek jáne ony óńdep, sosyn ǵana malǵa bergen jón, - deıdi ǵylymı-zertteý ınstıtýtynyń basqarma tóraǵasy Altynbek Abdýllaev.
Semınarǵa qatysýshylarǵa óńirdegi «Zenchenko jáne K» komandıttik seriktestiginiń mal azyǵyn daıyndaý, ósirý, óńdeý, jemshópti durys saqtaý tájirıbesi kórsetiledi, qandaı suryptardy Soltústik óńirde ósirgen tıimdi bolatyndyǵy týraly keńes beriledi.
Qatysýshylarǵa reseılik ǵalym Ivan Vınogradov dáris oqyp, mal azyǵyn qalaı qunarly etip daıyndaý ádis-tásilderin túsindirip, tyń ıdeıalaryn ortaǵa salmaq.
- Jemazyq júıesindegi sońǵy ınnovatsııalar jaıynda, shóp shúıgin shyǵýy úshin jáne ekonomıkalyq jaǵynan tıimdi bolýy úshin qandaı tuqymǵa basymdyq berý kerek – sharýashylyqtardyń ókilderimen kezdesý barysynda osy týraly aıtamyz. Óıtkeni «sıyrdyń súti – tilinde» deımiz. Al etti baǵytqa keler bolsaq, mysaly angýs tuqymy, eger aldyndaǵy jemshóbi durys bolsa, táýligine 1,5 kelige deıin qosady, - deıdi K.A.Tımırıazev atyndaǵy Máskeý aýylsharýashylyq akademııasynyń ósimdik sharýashylyǵy jáne shalǵyndyq ekojúıe kafedrasynyń dotsenti Ivan Vınogradov.
Esterińizge salaıyq, Aýyl sharýashylǵy mınıstri Aıdarbek Saparov mal sharýashylyǵyn damytýǵa kooperatıvter arqyly berilip kelgen sýbsıdııalar toqtaıtynyn aıtqan edi.