SQO-da eýrostandartqa saı sút fermasy iske qosyldy
PETROPAVL. QazAqparat – Soltústik Qazaqstan oblysy Meńgeser eldi mekeninde jańa sút fermasy paıdalanýǵa berildi, dep habarlaıdy QazAqparat tilshisi.
SQO Mamlıýt aýdanyndaǵy Meńgeser eldi mekeninde ashylǵan sút fermasy «Mámbetov jáne K» komandıttik seriktestigine tıesili. Qurylysy byltyr bastalǵan nysan Germanııadan ákelingen zamanaýı jabdyqtarmen jaraqtandyryldy. Ferma tolyq tsıfrlandyrylǵan. Jobanyń quny 2,3 mlrd teńge.
Jańa fermanyń jumysymen tanysqan SQO ákimi Qumar Aqsaqalov bul jaıynda Facebook jelisinde oqyrmandarymen bólisti.
«Búgin «Mámbetov jáne K» KS-niń Meńgeserdegi jańa sút fermasyna bardym. Tsıfrlyq ferma eýropalyq qondyrǵylarmen jabdyqtalǵan. 35 turaqty jumys orny ashyldy. Endi aýyldyqtar jyl boıyna eńbekpen qamtylmaq», - dep jazdy Qumar Aqsaqalov.
Sharýashylyq sımmental tuqymdas iri qaranyń basyn kóbeıtken. Al ár sıyrdan jylyna 6 myń lıtrge deıin sút alýǵa bolady eken.
Qumar Aqsaqalovtyń aıtýynsha, bıyl óńirde 4 sút fermasy ashylady. Bul sút óndirisin 11 myń tonnaǵa ulǵaıtpaq. 2018 jyly 4 ferma iske qosyldy. Kelesi jylǵa osyndaı taǵy 10 keshenniń qurylysy josparlanǵan.
