SQO-da et eksporty ulǵaıtylmaq
PETROPAVL. QazAqparat - SQO-y et eksportyn ulǵaıtpaq, dep habarlaıdy QazAqparat tilshisi.
Ónim sapasy halyqaralyq talapqa saı bolý úshin byltyr Taıynsha aýdanynda 3 myń iri qaraǵa shaqtalǵan bordaqylaý alańy ashyldy.
SQO Іshki saıasat basqarmasynyń málimetinshe, qazir munda 400-ge jýyq qazaqtyń aqbas, gereford jáne angýs tuqymdy iri qara mal semirtilip jatyr. Etti tuqym bolǵandyqtan árqaısysynyń salmaǵy 2 tsentnerge deıin jetedi eken.
Bıyl mal bordaqylaý keshenin toltyrý kózdelgen. Sapasy joǵary et alý úshin tek asyl tuqymdy mal jemdeledi. Ónim, ázirshe el ishinde saýdalansa, bolashaqta Reseı men Qytaı memleketterine eksporttaý josparlanǵan.
«Mal bordaqylaý alańynda mal semirtýdiń artyqshylyǵy óte kóp. Jem-shóppen tolyq qamtylady. Tez semirtiledi, kúnine 1 kelige deıin salmaq qosýy múmkin. Durys jemdelgennen keıin ettiń sapasy jaqsy bolady. Sondaı-aq, ár bergen kg etke memleketten 200 teńge demeýqarjy alady», - deıdi SQO aýyl sharýashylyǵy basqarmasy basshysynyń orynbasary Talǵat Naýryzbaev.
SQO-da qazir 12 kásiporyn et ónimderin shyǵarýmen aınalysady. Byltyr óńir sharýalary 56 myń tonnaǵa jýyq et óndirse, sonyń 8,2 myń tonnasy qaıta óńdeýge jiberilgen. Kórshi elderden de qara mal etine suranys joǵary. 2018 jyly Reseı Federatsııasyna 505 tonna ónim satylǵan.
Mamandardyń aıtýynsha, qazir Qorǵan oblysynyń Kýrtamyshskıı aýdanymen kelissózder júrgizilip jatyr. Eki jaqqa tıimdi baǵaǵa kelisken jaǵdaıda bul aýdanǵa jyl saıyn 1,5 myń tonna et jóneltiletin bolady.
