SQO-da esirtkimen ustalǵan áıel 11 jylǵa bas bostandyǵynan aıyryldy

PETROPAVL. KAZINFORM — Soltústik Qazaqstan oblysynda sıntetıkalyq esirtkini taratqany úshin 24 jastaǵy kelinshek sottaldy.

SQO polıtsııa departamenti baspasóz qyzmetiniń málimetinshe, Petropavl turǵyny sıntetıkalyq esirtkimen ótken jyldyń jazynda ustalǵan. Tintý kezinde odan taratý úshin daıyndalǵan 20,95 gramm α-PVP jáne 23,71 gramm «mefedron» tárkilendi. Tergeý barysynda kelinshektiń esirtkini qalanyń shetindegi orman ishine jasyrylǵan jerden alyp ketkeni anyqtaldy.

Jalpy salmaǵy 0,17 gramm bolatyn α-PVP esirtkisi salynǵan folgamen oralǵan taǵy 3 túıinshek onyń qolsómkesinen tabyldy. Asa iri mólsherge jatatyn esirtkini ol ózi paıdalanbaq bolǵan.

Ustalǵan kelinshek buǵan deıin 20 jasynda esirtkini ótkizý maqsatynsyz saqtaǵany úshin sottalyp, jazasyn ótedi. Sot onyń is-áreketinde qaýipti retsıdıvti baıqap, 11 jylǵa bas bostandyǵynan aıyrý jazasyn taǵaıyndady.

Ótken jyly polıtseıler SQO-da esirtki satýdyń 132 faktisin anyqtady. Zańsyz aınalymnan 8 keliden astam sıntetıkalyq psıhotroptyq zattar tárkilenip alyndy.

Buǵan deıin joq páterlerdi «jalǵa berip kelgen» almatylyq turǵynnyń SQO-da16 epızod boıynsha sottalǵanyn jazǵan edik.