SQO-da Esil ózeniniń sý deńgeıi kóterilip jatyr

PETROPAVL. KAZINFORM – Soltústik Qazaqstan oblysy Toqsan bı aýylynyń mańynda Esil ózeni bir táýlikte 119 sm-ge kóterildi.

«Qazgıdromet» RMK SQO fılıalynyń málimetinshe, Ǵabıt Músirepov atyndaǵy aýdannnyń Toqsan bı aýylynyń mańynan ótetin Esil ózeniniń deńgeıi sońǵy 2-3 kúnde 3 metrden artyq kóterilgen. Bul jerde muz kóterilip, qozǵaldy.

Esil ózeni tómen qaraı Shal aqyn aýdanynyń Kreşenka eldi mekeniniń mańynda birden 30 sm-ge kóterildi. Munda sý muz ústine shyqty.

Pokrovka eldi mekeni mańynda 11 sm-ge, Dolmatovo aýylynyń janynda ózenniń sý deńgeıi 14 sm-ge ózgergen.

Sergeev sý qoımasynda da ózgeris bar, bir táýlikte 19 sm-ge artyp, kún jylynǵaly sý deńgeıi 43 sm-ge kóterilgen. Qazir bógen 89 % tolyq.

Óńirdegi shaǵyn ózenderdiń de sýy kóterilip keledi. Máselen, Vozvyshenka eldi mekeni mańyndaǵy Aqanburlyq ózeniniń deńgeıi bir táýlikte 29 sm-ge, naýryz aıynyń sońynan bastap 2 metrge tolyqqan. Biraq ázirge qaýipti deńgeıge jetken joq.

Buǵan deıin Aqqaıyń aýdany Severnoe eldi mekeni mańynda Shaǵalaly ózeniniń bir táýlikte 1,5 metrge kóterilgenin aıtqan edik. Qaýip seıildi. Ótken táýlikte mundaǵy sý deńgeıi 33 sm-ge tústi.