SQO-da Esil ózeniniń 32 shaqyrymdyq arnasy tereńdetilip, tazartylady
PETROPAVL. KAZINFORM - Soltústik Qazaqstan oblysynda gıdrotehnıkalyq qurylystardy jańǵyrtý jáne sý tasqyny qaýpin azaıtý maqsatynda jumystar jalǵasqan.
Esil basseındik sý ınspektsııasynyń málimetinshe, bul jumystar Qazaqstan Respýblıkasynyń sý salasyn damytýdyń 2024–2028 jyldarǵa arnalǵan keshendi jospary aıasynda júzege asyrylady. Negizgi maqsat - qoldanystaǵy gıdrotehnıkalyq nysandardyń jaǵdaıyn jaqsartý, olardyń qaýipsizdigin qamtamasyz etý jáne eldi mekenderdi sý tasqynynan qorǵaý.
SQO-da barlyǵy 18 gıdrotehnıkalyq qurylys bar. Onyń beseýi respýblıkalyq, 12-si kommýnaldyq, bireýi jeke menshikte.
Qazir eki iri nysan boıynsha - Taldysaı ózenindegi Jambyl sý kóterý bógetin sý qoımasymen birge salý, sondaı-aq Ýálıhanov aýdanynyń Tileýsaı aýyly mańyndaǵy sý kóterý bógetin sý qoımasymen birge rekonstrýktsııalaý jobalary ázirlenip, memlekettik saraptamadan ótkizilip jatyr.
Budan bólek, birqatar gıdrotehnıkalyq nysannyń naqty jaǵdaıyn baǵalaý úshin kóp faktorly zertteýler júrgizile bastady. Olardyń qatarynda Lenıngradskoe jáne Kóbensaı aýyldary mańyndaǵy sý kóterý bógetteri, Esil aýyly mańyndaǵy tireýish-retteýshi bóget, sondaı-aq «Omýtkı» jáne «Gorkoe» jınaqtaýshy toǵandarynyń qorshaý bógetteri bar.
Byltyrdan beri oblysta alty qorǵanysh bógetin salý jáne rekonstrýktsııalaý, sondaı-aq bir jaǵalaýdy bekitý jobasy iske asyryla bastady. Bıyl olardyń tórteýin paıdalanýǵa berý jáne keıin «Qyzyljar sý qoımalary» kommýnaldyq memlekettik mekemesiniń balansyna ótkizý josparlanǵan.
Budan bólek SQO úshin mańyzdy jobalardyń biri - Petropavl gıdrotorabynan bastap Esil ózeniniń 32 shaqyrymdyq bóligin tereńdetý jáne tazartý.
Joba sý tasqyny qaýpi bar ýchaskelerdi sanatsııalaý jónindegi jol kartasy aıasynda ázirlendi. Qujat memlekettik saraptamadan ótip, oń qorytyndy alǵan. Jobany júzege asyrýǵa 32,8 mlrd teńge jumsalmaq. Bul jumys ózen arnasynyń ótkizý qabiletin arttyrýǵa jáne sý tasqyny kezinde sýdyń kedergisiz ótýin qamtamasyz etýge baǵyttalǵan.
Sonymen qatar, Sokolovka aýyly mańynda Esil ózeniniń uzyndyǵy 870 metr ýchaskesinde arnany túzetý jumystary júrgizildi. Novonıkolskoe aýyly mańynda ózen jaǵalaýy bekitildi. Al Petropavldaǵy Jeńis saıabaǵy aýmaǵynda nóser kárizin salý jumystary qolǵa alynǵan.
Buǵan deıin Petropavlda Esil ózeniniń jaǵalaýyn nyǵaıtý jumysy bastalǵanyn jazǵan edik.
