SQO-da Esil ózeniniń 32 km qamtıtyn túbi tazartylyp, tereńdetilmek

PETROPAVL. KAZINFORM – Soltústik Qazaqstan oblysynda kóktemde sý basýy múmkin 112 eldi meken esepke alynǵan. Bul tizimnen Bolshaıa Malyshka eldi mekeni shyǵaryldy.

2024 jylǵy kóktemge deıin Bolshaıa Malyshka eldi mekeninde 900-deı adam turdy. Tasqyn kezinde aýyldaǵy júzge jýyq baspana sý astynda qalyp, keıin apatty dep tanyldy. Turǵyndardyń keıbiri kóship ketti, endi biri sýdan zaqym kelgen úıin bıýdjet esebinen qalpyna keltirip, kindik qany tamǵan mekendi tastap kete almady. 

SQO ákimdiginiń málimetinshe, Bolshaıa Malyshka aýylyn jańǵyrtý jumystarynyń nátıjesinde bógetti shaıyp ketý jáne eldi mekendi sý basý qaýpi joıyldy. Munda uzyndyǵy 4,5 km-ge topyraq úıindisi salynyp, 200 myń m3 astam ınertti materıal qabaty tóseldi, onyń bıiktigi 6 metrge deıin jetkizildi.

Jergilikti bıýdjet esebinen Sokolovka aýyly mańynda Esil ózeniniń arnasyn túzetý jumystary oryndalǵan. Sondaı-aq qazir jylda sý basatyn Petropavldaǵy Zarechnyı kenti turǵyndaryn josparly túrde kóshirý jalǵasqan.

Búginge deıin 53 otbasy jańa páter kiltin aldy. Qosymsha osy jyldyń mamyr aıynda 72 páterli úıdiń qurylysyn aıaqtaý josparlanǵan, sondaı-aq bıyl 117 páterli úıdiń qurylysy bastalady.

Kóktemde Esil ózeni sýy deńgeıiniń kóterilýi jáne Petropavl gıdrotorabyna túsetin júktemeni azaıtý maqsatynda tasqynmen kelgen sýdy burý úshin aınalma arna salyndy. Bul maqsatqa 328 mln teńge jumsaldy.

Qazirgi ýaqytta Esil ózeniniń túbin tazartý jáne tereńdetý jumystary josparlanǵan. Jobalyq-smetalyq qujat ázirlendi, ol memlekettik saraptamada jatyr. Nátıjesinde Petropavl sý torabynan tómen qaraı 32 km aýmaq qamtylmaq.

Buǵan deıin SQO-daǵy iri sý qoımalary sý tasqynyna daıyn turǵanyn jazǵan edik.