SQO-da esirtkini jarnamalap, ınternet-dúken arqyly satty degen kúdikpen eki jigit ustaldy

PETROPAVL. QazAqparat – Soltústik Qazaqstan oblysynda sıntetıkalyq esirtkini satýdy kásip etti degen kúdikpen 20 jáne 22 jastaǵy eki jigit ustaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavlda polıtseıler jedel is-shara kezinde 20 jastaǵy oblys ortalyǵynyń turǵynyn jáne oblys mańyndaǵy aýdandardyń birinde turatyn 22 jastaǵy jigitti ustap, qamaýǵa aldy. Olar sıntetıkalyq esirtkini satty jáne jarnamalady degen kúdikke ilinip otyr. Qylmystar Telegram messendjerindegi «ınternet dúken» arqyly jasalǵan.

Jeke tintý kezinde, sondaı-aq jigitter jaldap turǵan jaldamaly páterdi tekserý barysynda esirtkige uqsas zat salynǵan polımer túıinshikter alyndy. Saraptama nátıjesine sáıkes, bul «spaıs» ataýymen belgili psıhobelsendi zattyń kontsentraty ekeni anyqtaldy. Jalpy mólsheri 250-den astam bir rettik doza jasaýǵa jetedi. Sondaı-aq býyp-túıetin materıal – 500 zıplok paketi tárkilendi.

Atalǵan faktiler QR Qylmystyq kodeksiniń 297-baby 3-bóligi jáne 299-1-baby 2-bóligi boıynsha Sotqa deıingi tergep-tekserýdiń biryńǵaı tizilimine engizildi.

«Endi ǵana eresek ómirge aralasqan jastardyń esirtki bıznesine qyzyǵýy asa ózekti másele. Bıyl túrli esirtki qylmysy úshin 25 jasqa deıingi 27 adam ustaldy. Sıntetıkalyq esirtkilerdi saýdalaǵany úshin 7 jigit sottaldy. Basqarma jastardyń esirtki qylmysyna tartylýynyń aldyn alý boıynsha jumys júrgizedi. Mamandar bilim mekemeleriniń oqýshylarymen kezdesken kezde esirtki zattaryn taratqany ǵana emes, nasıhattaǵany úshin de kózdelgen jaýapkershilik týraly eskertedi», - deıdi SQO Polıtsııa departamenti Esirtki qylmysyna qarsy is-qımyl basqarmasynyń bastyǵy Ivan Terzıdı.

Jyl basynan SQO-da zańsyz aınalymnan 383 kg esirtki tárkilendi, onyń 2 kg astamy sıntetıkalyq esirtki.