SQO-da esirtki jarnamalaýshylarmen kúresý maqsatynda arnaıy chat ashyldy
SQO PD baspasóz qyzmetiniń habarlaýynsha, arnaıy chat bir jyl buryn Esirtki qylmysyna qarsy is-qımyl basqarmasy mamandarynyń uıymdastyrýymen ashyldy. Qazir ol jerde tártip saqshylarynan basqa 100-den astam PIK tóraǵasy, qalalyq turǵyn úı-kommýnaldyq sharýashylyǵy bóliminiń ókilderi otyrady. Táýligine orta eseppen 6 habarlamaǵa deıin túsedi.
«Ortaq chatqa kelgen habarlamalar muqııat tekseriledi. Mundaǵy maqsat - esirtki saıttaryn jarnamalaǵan jazbalardy joıý. Kez kelgen adam qaýipti jazýdy kórgen jaǵdaıda ony ózdiginen boıaı alady nemese chatqa sýretin, naqty mekenjaıyn kórsetip jiberýine bolady. Tek bizdiń qyzmetkerler ǵana osyndaı ortaq jumystardyń nátıjesinde 209 graffıtıdi boıady», - deıdi Esirtki qylmysyna qarsy is-qımyl basqarmasy bastyǵy Jandos Basybaev.
Sondaı-aq chattyń kómegimen tártip saqshylary jarnama jazýmen aınalysqan 7 adamdy jáne sıntetıkalyq esirtkini taratyp júrgen eki adamdy ákimshilik jaýapkershilikke tartty. Al, shildeniń 5-inen bastap zańnamaǵa engizilgen ózgertýler kúshine enip, esirtki saıttaryn jarnamalaýshylarǵa, tyıym salynǵan zattardy taratýshylarǵa qylmystyq is qozǵalatyn bolady.
Jyl basynan polıtseıler 740,67 gr dızaınerlik esirtkini aınalymnan aldy. Sondaı-aq esirtki satýmen aınalysyp kelgen 97 ınternet-resýrs buǵattaldy. Onyń keıbirin chattyń arqasynda anyqtaý múmkin bolǵan.