SQO-da esirtki satqan eki jas jigit sottaldy

PETROPAVL. QazAqparat – Soltústik Qazaqstan oblysynda esirtkini óndirgeni, jarnamalaǵany jáne satqany úshin eki jigit 6 jáne 10 jylǵa sottaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavlda 21 jáne 22 jastaǵy qala turǵyndaryna qatysty sot úkimi shyqty. Jigitterdiń biri esirtki saýdasyna qatysty 6 jylǵa sottalsa, ekinshisi 10 jylǵa bas bostandyǵynan aıyryldy.

Polıtseıler Petropavl turǵyndaryn qańtar aıynda turǵylyqty jerinen ustady. Páterden esirtki jasaýǵa arnalǵan quraldar jáne 1,18 gramm sıntetıkalyq kannabınoıd alyndy, bul asa iri kólemge jatady. Budan bólek, olardyń kórsetken jerleri boıynsha esirtki jasyrýǵa arnalǵan 12 oryn anyqtaldy. Ol jerlerden ósimdik tektes zat salynǵan «túıinshekter» alynyp, quramyn anyqtaý úshin saraptamaǵa jiberildi.

Satýǵa ázirlengen túıinshikterge «spaıs» ataýymen belgili esirtki salynǵan eken. Jalpy salmaǵy 4,81 gramm.

«Jas jigitter «spaıs» qospasyn ózderi daıyndaǵan, keıin ózderi ashqan ınternet-dúken arqyly satqan. Budan bólek, olardyń bireýi sıntetıkalyq esirtkini jáne Telegram messendjerindegi ınternet-dúkendi jarnamalaýmen aınalysqan. Biraq olardyń «jumysy» eki aptadan aspady», – deıdi SQO Polıtsııa departamenti Esirtki qylmysyna qarsy is-qımyl basqarmasy bastyǵynyń mindetin atqarýshy Ivan Terzıdı.

Bıylǵy 7 aıda SQO-da esirtki satýǵa qatysty 46 fakti tirkeldi. Zańsyz aınalymnan 333 kg túrli esirtki zaty alyndy, onyń 1,5 kg sıntetıkalyq esirtki.