SQO-da Esil ózeniniń sýy kóterilip keledi
PETROPAVL. QazAqparat – Soltústik Qazaqstan oblysynda shaǵyn ózenderdiń sý deńgeıi túsip, Esil ózeniniń sýy kóterilip keledi, dep habarlaıdy QazAqparat tilshisi.
«Qazgıdromet» RMM SQO fılıalynyń málimetinshe, Esil ózeninde ornalasqan baqylaý pýnktteriniń barlyǵynda sý deńgeıiniń kóterilgendigi tirkeldi. Al oǵan quıatyn shaǵyn ózenderde, Gýsakovka eldi mekeni mańyndaǵy Babyqburlyq ózenin eseptemegende, kerisinshe, sý deńgeıi túsip jatyr. Máselen, Kovylnoe aýylynyń mańyndaǵy Aqanburlyq ózeni bir táýlikte 62 sm-ge, Rýzaevka eldi mekeni mańyndaǵy Sharyq ózeni – 71 sm-ge azaıdy.
Al Esil ózeni Pokrovka aýylynyń mańynda 131 sm-ke kóterilse, eń maksımaldy ózgeris Sergeevka qalasynyń mańynda 285 sm tirkeldi. Petropavldaǵy kórsetkish – 49 sm.
Óńirdegi Úlken Torańǵul kóliniń de tasý qaýpi bar. Ázirge ol bir táýlikte 12 sm-ge ózgergen. Muzy jarylyp jatyr. Kólge quıatyn Qamysaqty ózeniniń deńgeıi kerisinshe 89 sm-ge tómendedi.
Sergeev sý qoımasy eki kúnnen beri asyp-tógilip jatyr. Bir táýlikte erneýden tógilý deńgeıi 119 sm-ge jetti.
