SQO-da Esil ózenine qulap ketken balyqshy jarty táýlikten keıin qutqaryldy
PETROPAVL. QazAqparat – Soltústik Qazaqstan oblysynda qutqarýshylar Esil ózenine abaısyzda qulap ketken balyqshyny turǵyndardyń kómegimen jarty táýlikten keıin taýyp, qutqardy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, 21 maýsym kúni keshqurym 112 telefon nómirine er adam habarlasyp, óziniń Esil ózeniniń jarqabaǵynda turǵanyn, tómennen bireýdiń kómek surap aıqaılap jatqanyn aıtqan. Birden Esil aýdandyq tótenshe jaǵdaılar jáne aýdandyq polıtsııa bólimderi, ıAvlenka jedel medıtsınalyq járdem qyzmetkerlerine habar beriledi.
Oqıǵa ornyna birinshi jetken aýdannyń bas qutqarýshysy Juldyz Esenǵazın telefon shalǵan er adamnan mán-jaıdy bilip, jardan tómenge túsedi.
«Kómek surap shaqyrǵan álsiz daýysqa qaraı júrdim. Qarańǵyda keýdesine deıin sýda turǵan adam sulbasyn kórdim. Sýdan alyp shyqqanymda aıqaılamaq turmaq, sóıleýge de shamasy kelmedi. Ózenniń muzdaı sýyna tońyp qalypty. Jaǵaǵa shyǵarǵanymda áriptesterim men polıtseıler de kelipti. Zardap shegýshini zembilge jatqyzyp, alǵashqy, sonyń ishinde psıhologııalyq kómek kórsetildi», - deıdi Esil aýdandyq tótenshe jaǵdaılar bóliminiń basshysy Juldyz Esenǵazın.
Er adamdy jedel járdem qyzmeti aýdandyq aýrýhanaǵa jetkizdi. Mamandardyń aıtýynsha, qazir onyń ómirine keler qaýip joq, jaǵdaıy birqalypty.
Sýǵa qulaǵan Esil aýdanynyń ortalyǵy ıAvlenka eldi mekeniniń 1948 jyly týǵan turǵyny. Ol tańerteń saǵat 10.00 shamasynda aýyldan 2 shaqyrymdaı qashyqta ornalasqan ózenge balyq aýlaýǵa barǵan. Túske taman aıaǵy taıyp ketip, sýǵa qulaǵan. Sodan ózdiginen shyǵa almaı, túnge deıin kómekke shaqyryp aıqaılaýmen bolǵan.
«Er adam - ІІ toptaǵy múgedek. Qumǵa batqan aıaǵyn sýdan óz kúshimen shyǵara almapty. Kómek kelmegende bul oqıǵa múldem basqasha aıaqtalar edi. Ol negizgi qaýipsizdik erejelerin saqtamaǵan. ıAǵnı, qaýipti jerde balyq aýlamaq bolǵan jáne ózimen birge uıaly telefon almapty», - deıdi SQO TJD bastyǵynyń orynbasary Igor Jýkov.
SQO-da mamyr aıynan beri 4 adam sýǵa ketti. Jalpy sońǵy 7 jyldyń ishinde 180 adam sýǵa batsa, sonyń 24-i - bala.
