SQO-da Esil ózeni arnasynan 9 shaqyrymǵa deıin jaıylyp ketti
PETROPAVL. QAZAQPARAT - Soltústik Qazaqstan oblysyndaǵy Esil ózeniniń deńgeıi artý ústinde, dep habarlaıdy «Qazaqparat» tilshisi.
Óńirdiń basty ózeniniń tasýynan qazirgi ýaqytta Qyzyljar aýdany men Petropavldyń jaǵaǵa jaqyn ornalasqan shaǵyn aýdandary zardap shegýde. Oblys ortalyǵynda tótenshe jaǵdaı keshe jarııalandy, búgin Qyzyljar aýdanynda engizilip otyr.
Jańa bóget ózine júktelgen mindetti ázirge atqarǵanymen bul jerde de sý arnasynan asýǵa taıaǵan. Ótken túni onyń bir bóliginiń shaıylyp ketý qaýpi týyndap, der kezinde sharalar qoldanyldy. Áıtpegende, sý basý aýmaǵy birneshe ese artar edi.
Kojzavod aýylyndaǵy Ryjov kóshesiniń sý astynda qalǵan bóligi qazir Venetsııany eske salady. Mundaǵy sý deńgeıi úılerdiń terezelerine jetken. Sharýashylyq jaılar sý astynda, tipti, keıbiri tehnıkalaryn da alyp úlgermegen. Adamdardy «vahtovka» atalyp ketken júk kólikterimen tasymaldaýda. Kóptegen adamdar óz ómirlerin qaterge tigip, úılerin tastap ketýden bas tartyp otyr. Aýylda kúndiz-túni qutqarýshylar men polıtsııa qyzmetkerleri kezekshilikte júr.
Oblys ákiminiń aıtýynsha, sý deńgeıiniń kóterilýi toqtaı sala sý basqan aýmaqtar qorshalyp, sý sorǵyý jumystary júrgiziledi. Zardap shekken aýmaqtarǵa búkil tehnıka jetkizilip, komıssııa materıaldyq shyǵyn kólemin eseptemek.
«Ótken táýlikte sý deńgeıi taǵy 34 santımetrge kóterildi. Sý áli de kóterilý ústinde. Ózenniń arnasy keı jerlerde 9 shaqyrymǵa jetti. Sý jazǵy deńgeıinen 9 metr joǵary. Orasan kóp sý Sergeev sý qoımasynan keldi. Oblys boıynsha 171 úı sý astynda qaldy, aýlalar odan da kóp. Bógetti nyǵaıtý jumystary túni boıy júrgizildi», - dedi oblys ákimi Qumar Aqsaqalov.
Eń joǵarǵy sý deńgeıi búgin keshke bolady dep kútilýde.
