SQO-da Esil ózeni arqyly ótetin jańa kópir paıdalanýǵa berildi
PETROPAVL. QazAqparat – Soltústik Qazaqstan oblysynda Esil ózeni arqyly ótetin jańa avtokólik kópiri paıdalanýǵa berilip, sol mańdaǵy turǵyndardyń negizgi máseleleriniń biri sheshildi, dep habarlaıdy QazAqparat tilshisi.
Kóktemde Esil ózeni tasyǵan kezde eski kópir sý astynda qalyp, eldi mekenderdiń oblys ortalyǵymen baılanysy úziletin. Jańa kópir «Novonıkolskoe-Andreevka-Bostandyq-Novomıhaılovka» avtojolymen baılanysady.
Qyzyljar aýdany Novonıkolskoe eldi mekeniniń mańynda salynǵan kópirdiń uzyndyǵy – 221,5 metr, eni – 8 metr, sýdan bıiktigi – 63 metr. Joba memlekettik-jekeshelik áriptestik aıasynda júzege asyp, qurylysqa shamamen 4,2 mlrd teńge jumsaldy. Qurylysqa «Zenchenko ı K» komandıttik seriktestigi qarjylaı úles qosty.
SQO ákimdiginiń málimetinshe, Novonıkolskoe eldi mekeninde ǵana qazir 500-ge jýyq shańyraq bar, onda 1,5 myńdaı adam turady. Oblystaǵy eń iri sharýashylyqtardyń biri – «Zenchenko ı K» komandıttik seriktestigi ornalasqan. Orta mektep, balalar baqshasy, sport saraıy, mádenıet úıi, dárigerlik ambýlatorııa jumys isteıdi. Eldi mekennniń óz qazandyǵy bar, oǵan barlyq áleýmettik nysandar jáne 150 turǵyn úı qosylǵan.
