SQO-da esh jerde tirkelmegen tarıhı-mádenı mura nysandary anyqtaldy
PETROPAVL. KAZINFORM – Bul nysandar Soltústik Qazaqstan oblysynyń Esil jáne Ǵ.Músirepov atyndaǵy aýdandarda anyqtaldy.
SQO mádenıet, tilderdi damytý jáne arhıv isi basqarmasynyń málimetinshe, bıyl tarıhı-mádenı murany qorǵaý jáne paıdalaný ortalyǵy Esil, Shal aqyn jáne Ǵabıt Músirepov atyndaǵy aýdandar aýmaǵynda ashyq ádispen ıgerilip jatqan paıdaly qazbalar ken oryndarymen irgeles aýmaqtarda dalalyq zertteý jumystaryn júrgizdi. Maqsat – mańyzdy tarıhı-mádenı muranyń joıylýyna jol bermeý.
Zertteý nátıjesinde qazirgi ýaqytta memlekettik qorǵaýǵa alynbaǵan birneshe arheologııalyq nysan anyqtaldy. Sonyń ishinde, Esil aýdany Lýzınka aýyly mańynda úlken qorǵan jáne Ǵ. Músirepov atyndaǵy aýdanda Kýprııanovskoe ken ornyna jaqyn ornalasqan qorǵan tirkeldi.
Bul nysandar QR Mádenıet jáne sport mınıstriniń «Tarıh jáne mádenıet eskertkishterin anyqtaý, esepke alý, mártebe berý jáne odan aıyrý, ornyn aýystyrý jáne ózgertý, jaı-kúıin monıtorıngteý qaǵıdalaryna sáıkes esepke alý tizimine engizilýi tıis. Nátıjesinde olardy ǵylymı turǵydan zertteý jáne qorǵaýǵa alý múmkin bolmaq.
Mamandardyń aıtýynsha, aldaǵy ýaqytta oblystyq tarıhı jáne mádenı eskertkishterdi qorǵaý jónindegi komıssııanyń otyrysy ótedi. Oń sheshim qabyldanǵan jaǵdaıda jańadan anyqtalǵan nysandar SQO-nyń tarıhı-mádenı murasynyń aldyn ala esepke alý tizimine engiziledi.
Keıin nysanǵa arnaıy eseptik kartochka toltyrylyp, ol týraly bastapqy derekter, qysqasha sıpattama jáne ıllıýstratsııalyq materıaldar engiziledi.
Buǵan deıin SQO-da Aryqbalyq aýylynyń turǵyny mamonttyń súıekterin tapqanyn jazǵan edik.
