SQO-da erteń qatty aıazǵa baılanysty oqýshylar mektepke barmaıdy

PETROPAVL. KAZINFORM — Soltústik Qazaqstan oblysynda 14 qańtarda aýa temperatýrasynyń -35 gradýsqa deıin tómendeýine baılanysty mektepterde sabaq toqtatyldy.

«112» qyzmetinen kelgen habarlamada qatty aıazǵa baılanysty mektepterde birinshi aýysymda oqıtyn 0-12 synyptar jáne kolledjderdiń 1-2 kýrs oqýshylary úshin sabaq bolmaıtyndyǵy aıtyldy. 

SQO bilim basqarmasy da ata-analardy eskertip, erteń sabaqtyń onlaın formatqa aýystyrylatynyn habarlady.

Vedomstvonyń málimetinshe, ádette aýa temperatýrasy -25 gradýstan tómen jáne jeldiń ekpini 2 m/s joǵary bolsa 0-4 synyptar úshin, synap baǵany -27 gradýstan tómendese 0-9 synyptar úshin, -30 gradýstan tómen aıaz turǵanda 0-12 synyptar jáne kolledjderdiń 1-2 kýrstary úshin sabaq bolmaıdy. 

Sibir antıtsıklonynyń yqpalynan óńirde birneshe kún aıaz turmaq. 

Buǵan deıin qolaısyz aýa raıyna baılanysty Qazaqstannyń birqatar óńirinde kólik qozǵalysy shektelgenin jazǵan edik.