SQO-da erli-zaıypty ıis tıip kóz jumdy

PETROPAVL. QazAqparat – Soltústik Qazaqstan oblysynda erli-zaıypty ıis tıip ýlanyp, kóz jumdy, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, oqys oqıǵa 25 maýsym kúni Taıynsha aýdanynyń Gorkoe eldi mekeninde bolǵan. 112 qyzmetine aýyldaǵy úılerdiń birinde peshti durys jaqpaý saldarynan eki adamnyń – 1977 jylǵy er adam men onyń 1982 jylǵy áıeliniń qaza tapqany týraly habarlama túsedi. Erli-zaıypty ıis tıip, ýlanyp qalǵan.

Olardyń 2007 jyly týǵan uldary aýyr halde oblystyq balalar aýrýhanasyna jetkizildi. Qazir bala jansaqtaý bóliminde jatyr, ókpeni jasandy jeldetý apparatyna qosylǵan.

Qaza tapqandardyń denesi sot-medıtsınalyq saraptamaǵa jiberildi.

Mamandardyń aıtýynsha, bire kún buryn úıdegi pesh jóndelgen eken, alaıda is sońyna deıin jetkizilmepti. Saldarynan peshten ýly gaz shyqqan.