SQO-da erkin kúresten álem chempıony Nurqoja Qaıpanovqa jeńil kólik syıǵa berildi
PETROPAVL. KAZINFORM — Soltústik Qazaqstan oblysynyń sportshysy, erkin kúresten álem chempıony Nurqoja Qaıpanovqa jeńil kólik syıǵa berildi. Balýannyń ata-anasy men jattyqtyrýshysy da marapattaldy.
Búgin oblystyq ákimdikte chempıon Nurqoja Qaıpanovqa syı-qurmet kórsetildi. Óńir basshysynyń birinshi orynbasary Marat Tasmaǵanbetov sporttaǵy jetistikteri úshin balýanǵa SQO ákiminiń qurmet gramotasyn jáne avtokóliktiń kiltin tabys etti.
Jeke bapkeri Saǵyndyq Beısembaevqa 3 mln teńge somasynda aqshalaı syıaqy berilse, Nurqojanyń ata-anasy Aralbek Qaıpanuly men Perızat Qanatbaıqyzy SQO ákiminiń alǵysyna ıe boldy.
Buǵan deıin Albanııa astanasy Tıranada kúres túrlerinen olımpıadalyq emes salmaqtarda ótken álem chempıonatynyń altyn júldegeri Nurqoja Qaıpanovty Petropavlda temirjol vokzalynda saltanatpen kútip alǵanyn jazǵan edik. Bul balýannyń bes jyldan keıin alyp otyrǵan qomaqty júldesi. Endi ol aldaǵy olımpıada oıyndaryna daıyndalmaq.