SQO-da erigen qar sýy joldy shaıyp ketti
PETROPAVL. KAZINFORM – Soltústik Qazaqstan oblysy Taıynsha aýdanynda respýblıkalyq mańyzy bar avtojoldy sý shaıyp ketti.
Áleýmettik jelide taraǵan beınejazbada kólikterdiń sýdy keship ótip jatqanyn kórýge bolady. https://www.instagram.com/p/DWX6ST0ilUI/?img_index=2
Taıynsha aýdandyq ákimdiginiń málimetinshe, erigen qar sýy alqaptan kelip, 26 naýryz kúni saǵat 17:55 shamasynda Alabota aýyldyq okrýgine qarasty Aqqudyq aýyly mańynda joldy shaıyp ketken. Bul - respýblıkalyq mańyzy bar «Kókshetaý-Kishkenekól-Bıdaıyq-RF shekarasy (Omby)» A-13 avtojolynyń 118–119 shaqyrymynda bolǵan.
Alǵashqy málimet boıynsha, sý basqan joldyń eni shamamen 200 metr, al tereńdigi 15 sm bolǵan. Al 27 naýryz saǵat 00:10-daǵy jaǵdaı boıynsha sý azaıyp, 100 metrge deıin qysqarǵan, tereńdigi ózgerissiz qalǵan.
- Jaǵdaıdy turaqtandyrý maqsatynda arnaıy qyzmetter tarapynan jedel sharalar qabyldandy. Apat saldaryn joıý jumystaryna 11 tehnıka - avtogreıder, tıegish, samosvaldar jáne 12 adam jumyldyryldy. Jol jıegin kóterý jáne nyǵaıtý jumystary júrgizildi. Qazirgi ýaqytta kólik qozǵalysyna shekteý qoıylǵan joq. Qaýipsizdikti qamtamasyz etý úshin joldyń eki baǵytynda patrýldik polıtsııa qyzmetkerleri kezekshilik atqaryp jatyr, - delingen ákimdiktiń jaýabynda.
Mamandardyń aıtýynsha, Aqqudyq aýylynda evakýatsııalyq pýnkt daıyndalyp, turǵyndar úshin ashanada ystyq tamaq uıymdastyrylǵan. Jaǵdaıdy jergilikti atqarýshy organdar baqylaýda ustap otyr.
Buǵan deıin BQO-da Shaǵan jáne Derkól ózenderinde sý deńgeıi kóterilip jatqanyn jazǵan edik.