SQO-da eresek turǵyndardyń 24 paıyzy júrek-qan tamyrlary aýrýymen esepte tur
SQO kardıologııalyq ortalyqtyń málimetinshe, profılaktıkalyq medıtsınalyq tekserister skrınıngtik zertteýler arqyly júrgiziledi. Byltyr 51 995 adam júrek-qan tamyrlary aýrýlary boıynsha tekserilýi qajet bolsa, sonyń 47 083 dárigerlerge qaralǵan. Nátıjesinde 1 807 adamda, ıaǵnı 3,8 %-ynda aýrý anyqtalyp, 1803-i dıspanserlik esepke alynǵan.
«Skrınıngtik zertteýler barysynda aýdandarda syrqattardy anyqtaý deńgeıiniń tómendigi baıqalady. Oǵan medıtsınalyq mekemelerdiń kardıostandarttarmen nashar jabdyqtalýy, kardıolog mamandardyń jetispeýshiligi sebep. Máselen 13 aýdannyń tek ekeýinde ǵana kardıolog bar, qalǵandarynda bul mamandardyń mindetin basqalar atqarady. Demografııalyq jaǵdaıdy da nazarǵa alý qajet. Oblys turǵyndarynyń 13,7 %-y – 60 jastan asqandar jáne jalpy turǵyndardyń 22 %-y – júrek-qan tamyrlary aýrýy boıynsha «D» esepte tur, ıaǵnı olar skrınıngten ótpeıdi», - deıdi «SQO kópsalaly aýrýhanasy» ShJQ MKK kardıologııalyq ortalyq dırektory Azamat Maǵzumov.
SQO-da 408 228 eresek turǵyn bolsa, sonyń 98 871-i – júrek-qan tamyrlary aýrýlary boıynsha dıspanserlik esepte tur. Sonyń ishinde eń keń taraǵany arterıaldy gıpertenzııa, onymen 59 873 syrqat, júrektiń ıshemııalyq aýrýymen 23 138 adam dárigerlerdiń baqylaýyna alynǵan. Byltyr osy sanattaǵy naýqastardy dári-dármekpen qamtýǵa 1 mlrd 108 mln astam teńge jumsaldy.
«Byltyr qazan aıynda kardıologııalyq ortalyq negizinde medıtsınalyq ońaltý jáne qalypqa keltirý emi bólimshesi ashyldy. Ol 8 naýqasqa shaqtalǵan. Jyl sońyna deıin 60 adam em qabyldady. Olar mıokard ınfarktisinen keıingi jáne ota jasatqan syrqattar. Jalpy byltyr 2,5 myńǵa jýyq koronagrafııa, myńnan astam koronarlyq arterııany stendteý, júrek aqaýy boıynsha 67 ota, 80 aortokoronarlyq shýnttaý jasalyp, 109 elektrkardıostımýlıator qoıyldy, 200-ge jýyq elektrfızıologııalyq zertteý jáne 100 shaqty radıojıilikti ablıatsııa jasaldy», - deıdi Azamat Maǵzumov.