SQO-da er adam júrip kele jatqan kólikten qulap ketip, mert boldy
PETROPAVL. QazAqparat – Soltústik Qazaqstan oblysy Saýmalkól eldi mekeninde er adam júrip kele jatqan kóliktiń esigin ashyp, qulap ketti. Dárigerler onyń ómirine arasha túse almady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa Aıyrtaý aýdany Saýmalkóldegi aınalma joldaǵy kópirde bolǵan. Qostanaı qalasynyń birneshe turǵyny «Toyota RAV 4» kóligimen Kókshetaý qalasynan kele jatqan. Rólde áıel bolǵan, kólik ıesi - kúıeýi júrip kele jatqan kóliktiń esigin ashyp, abaısyzda qulap ketken.
Zardap shegýshini birden aýdandyq ortalyq aýrýhanaǵa jetkizgenimen, ol jansaqtaý bólimshesinde qaıtys boldy. Atalǵan fakti QR Qylmystyq kodeksiniń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha Sotqa deıingi tergep-tekserýlerdiń biryńǵaı tizilimine engizildi.
«Qaza tapqannyń týystarynyń aıtýynsha, er adamnyń elektrondy sıgareti túsip ketken. Sony alamyn dep esikti ashqan sátte qulap ketken. Avtokólik jolaýshylarynan qaýipsizdik máselesine jaýapkershilikpen qaraýdy, qaýipsizdik belbeýin aǵytpaýdy jáne qozǵalys kezinde esikti ashpaýdy suraımyz. Eger esikti ashý qajet bolǵan jaǵdaıda júrgizýshige belgi berip, kóliktiń tolyq toqtaǵanyn kútý kerek», - deıdi aýdandyq polıtsııa bóliminiń bastyǵy polıtsııa Marat Serkeshev.
Bolǵan oqıǵanyń mán-jaıy tolyq jáne jan-jaqty tergelip jatyr.
