SQO-da er adam tanysynyń otbasylyq qupııasyn taratqany úshin 4 jylǵa sottaldy

PETROPAVL. KAZINFORM – Soltústik Qazaqstan oblysynyń turǵyny tanysynyń telefonyn urlap alyp, ishindegi málimetke qol jetkizgen.

Іsti Aıyrtaý aýdandyq soty qarady. L.-ǵa adamnyń konstıtýtsııalyq quqyǵy men bostandyǵyna qarsy qylmys jasady degen aıyp taǵyldy.

Sot onyń buǵan deıin tanysy K.-nyń uıaly telefonyn urlap áketkenin jáne messendjer arqyly ortaq tanystary arasynda onyń jeke ómiri týraly, jeke jáne otbasylyq qupııany quraıtyn málimetterdi ádeıi taratqanyn anyqtady.

Sot L.-ny 4 jylǵa bas bostandyǵynan aıyrdy, úkim zańdy kúshine endi.

SQO prokýratýrasynyń málimetinshe, adamnyń jeke nemese otbasylyq qupııasyn, jeke ómiri týraly málimetterdi onyń kelisiminsiz taratqany ne ózge de derbes derekterdi zańsyz taratý - adamnyń quqyǵy men zańdy múddelerine eleýli zııan keltiredi. Bul úshin Qazaqstan Respýblıkasy Qylmystyq Kodeksiniń 147-babynyń 4-bóligi boıynsha qylmystyq jaýaptylyq kózdelgen.

Osy baptyń sanktsııasy alty jylǵa deıingi merzimge bas bostandyǵynan aıyrý túrindegi balamasy joq jazany kózdeıdi.

- Al eger buqaralyq aqparat quraldarynda, telekommýnıkatsııa jelilerinde nemese onlaın-platformalarda kópshilik aldynda sóılegen sózinde osyndaı málimetterdi taratqan jaǵdaıda úsh jyldan jeti jylǵa deıingi merzimge bas bostandyǵynan aıyrý túrindegi jaza kózdelgen.

Qazaqstan Respýblıkasy Konstıtýtsııasynyń 18-babyna sáıkes árbir azamatqa jeke ómirge, jeke jáne otbasylyq qupııaǵa qol suǵylmaýshylyq quqyǵy kepildendirilgenin eske salamyz, - deıdi prokýrorlar.

Buǵan deıin SQO-da bıyl kolledjdiń úsh oqýshysy esirtki satqany úshin sottalǵanyn jazǵan edik.