SQO-da er adam dalada bir táýlik boıy adasqan
Qutqarýshylar men polıtseıler 40 jastaǵy SQO turǵynyn bir táýlik boıy izdedi. Er adam salt atpen shyǵyp, adasyp ketken. Túk kórinbeıtin borannan baǵytynan adasyp, keıin qaıtatyn jolyn tappaǵan. Aýyl turǵynyn izdeýge TJ bólinisiniń jáne aýdandyq polıtsııa bóliminiń qyzmetkerleri jumyldyryldy. Abyroı bolǵanda, er adam qar qursaýynan óz betimen shyǵyp, jaqyn mańdaǵy eldi mekenge kelgen.
Al aqpannyń 15-inde M.Jumabaev aýdanynda ýchaskelik polıtsııa ınspektory Murat Aryqovtyń túnde turýyna týra keldi. Onyń kómegi borannyń saldarynan Molodogvardeıskoe aýylynyń janynda turyp qalǵan Aqmola oblysynyń úsh turǵynyna qajet boldy. Joldy qar alyp qalǵan, onyń ústine kólikteriniń isten shyǵýyna baılanysty jylyta almaǵan. Ýchaskelik ınspektor jergilikti sharýashylyqtyń basshysyna júginip, kólikti súıreıtin tehnıka suraǵan. Bes saǵattan astam dalada turyp qalǵan aqmolalyqtar qutqaryldy.
Soltústik Qazaqstan oblysynyń shalǵaı aýdandarynda boran áli soǵyp tur. Ýálıhanov jáne Aqjar aýdandaryndaǵy oblystyq mańyzy bar joldardaǵy qozǵalys áli de shekteýli.
– Aqpannyń qubylmaly aýa raıy soltústikqazaqstandyqtarǵa jaqsy tanys. Aýa raıy boljamyna qulaq asqan jón jáne kún raıynyń qolaısyz jaǵdaıy kezinde eldi mekenderden alysqa shyqpaýlaryn suraımyz, – deıdi SQO PD bastyǵynyń birinshi orynbasary Qanat Aıtbaev.
