SQO-da er adam bireýdiń kóligin aıdap áketken qaskúnemdi ustaýǵa kómektesti
PETROPAVL. QazAqparat – Soltústik Qazaqstan oblysy Býlaev qalasynyń turǵyny Petropavlda joǵalǵan avtokóliktiń tez arada tabylyp, ıesine qaıtarylýyna kómektesti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa 30 qazan kúni M.Jumabaev aýdanyndaǵy Býlaev qalasynda tańerteń bolǵan. Aýdan ortalyǵynyń 32 jastaǵy turǵyny Rýslan Nızamov kóshede turǵan kólikti kóredi. Soǵylǵan, ári jolda júrý erejesine qaıshy jol jıegine qoıylǵan avtomobıl birden nazaryn aýdarypty. Jaqynyraq kelgen ol kólikti júrgize almaı jatqan Býlaev qalasynyń turǵynyn kóredi. Burynnan tanıtyn Rýslan onyń avtomobıli joq ekenin biletin. Ári er adamnyń rólde mas kúıde otyrýy da onyń kúdigin týdyrady.
«Meniń ákem 25 jyl polıtsııada eńbek etti. Ol «únemi jan-jaǵyńa qarap júr, qyraǵylyq tanyt, bireý-mireýge kómek kerek bolsa kómegińdi aıama» dep aıtyp otyratyn. Onyń qatty mas ekenin kórip, men eń aldymen ol bireýdi soǵyp keter dep qoryqtym», - deıdi Rýslan Nızamov.
Polıtsııany shaqyrǵan ol tártip saqshylary kelgenshe mas adam ketip qalmasyn dep aldaýsyratqan, kóńilin aýlaǵan. Mashınanyń kiltin alyp qoımaqshy bolypty. Kóp uzamaı aýdandyq polıtsııa bóliminiń qyzmetkerleri kelip, qashyp ketpekshi bolǵan qaskúnemdi ustady. Keıin ol kóliktiń Petropavldan urlanǵany belgili boldy.
«Qala turǵyny keshqurym Ǵ.Músirepov kóshesinde mashınasyn qaldyryp, ertesine ornynan tappaǵan. Tańerteń kóliginiń urlanǵany jóninde aryz jazdy. Qazirgi ýaqytta sotqa deıingi tergeý júrip jatyr. «Volkswagen Passat» avtokóligi ıesine qaıtaryldy», - deıdi Birinshi polıtsııa bóliminiń bastyǵy Balabek Jaqın.
Ustalǵan Býlaev qalasynyń turǵynyna kólikti mas kúıde júrgizgeni úshin sondaı-aq ákimshilik hattama toltyryldy. Bul quqyq buzýshylyq úshin ol 20 táýlikke qamaýǵa alyndy.
