SQO-da er adam beton qorshaýdyń astynda qalyp, mert boldy
PETROPAVL. QazAqparat – Soltústik Qazaqstan oblysynda er adamnyń ústine abaısyzda beton taqta qulap, qaza tapty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, oqys oqıǵa Jambyl aýdanynyń Aıymjan aýylynda bolǵan. Beton qorshaý 47 jastaǵy er adamnyń ústine qulady.
«Iesiz qalǵan aýmaqta shóp jınap júrgen aýyl turǵynynyń ústine beton taqta qulap ketip, basyp qalǵan. Er adam alǵan jaraqatynan sol jerde jan tapsyrdy», - dedi baspasóz qyzmeti mamandary.
Mamandardyń aıtýynsha, qaza tapqan adam týysyna shóp jınasýǵa kómekke kelgen eken. Jumys istep júrip abaısyzda beton qorshaýǵa tıip ketýi múmkin. Erteden turǵan taqta qulap ketken. Oqıǵa ornyna kelgen polıtseıler aýyl turǵynynyń oqys oqıǵadan qaza tapqanyn rastady.
