SQO-da er adam bes jyl alıment tólemeı, qaryzy 5 mln teńgege jetken

PETROPAVL. QazAqparat – Soltústik Qazaqstan oblysynda balasyna bes jyl boıy alıment tólemegen turǵyn qylmystyq jaýapkershilikke tartylýy múmkin. Onyń osy aralyqtaǵy qaryzy 5 mln teńgege jýyqtaǵan, dep habarlaıdy QazAqparat tilshisi.

SQO Jeke sot oryndaýshylar aımaqtyq palatasynyń málimetinshe, boryshkerge atqarýshylyq óndiris 2018 jyly qozǵalǵan. Ol kámelet jasyna tolmaǵan ulyna barlyq tabysynyń ¼ shamasynda alıment tóleýi tıis. Alaıda boryshker balasynyń aldyndaǵy mindetinen qutylýǵa asyǵar emes.

«Boryshkerge izdeý de jarııaladyq, barlyq májbúrleý sharalaryn da qoldandyq. Qazirgi ýaqytta ol Petropavl qalalyq halyqty jumyspen qamtý ortalyǵyna jumyssyz retinde esepke alyndy. Eger de biz usynǵan jumystan eki ret bas tartatyn bolsa, ony qylmystyq jaýapkershilikke tartamyz», - deıdi SQO Jeke sot oryndaýshylar aımaqtyq palatasynyń jetekshisi Asan Matkárimov.

Qazirgi ýaqytta Jeke sot oryndaýshylar aımaqtyq palatasynyń qaraýynda 7 126 atqarýshylyq óndiris bar, olardyń 151-i – qasaqana alıment tólemeýshiler.

«Alıment boıynsha bereshegi bar 40 adamǵa izdeý jarııaladyq. Byltyr jalpy qaryz 261,2 mln teńge bolsa, bıyl 175,4 mln teńge.

Qaryzdy qaıtarýǵa qatysty jumystar atqarylyp jatyr. Eger alıment keminde úsh aıdan artyq tólenbese, boryshkerdiń mal-múlkine, barlyq esepshotyna tyıym salynady. Ol notarıaldyq is-áreket ete almaıdy, sondaı-aq boryshker lıtsenzııa, ruqsattar, tipti júrgizýshi kýáligin de ala almaıdy jáne buryn alynǵan bolsa ýaqytsha toqtatylady. Elden shyǵýǵa shekteý qoıylady», - deıdi Asan Matkárimov.

Buǵan deıin alıment tóleýden qashyp júrgen 31 adamnyń qamaýǵa alynǵanyn aıtqan edik.