SQO-da er adam aýyldastarynyń 140 mln teńgesin alaıaqtyq jolmen qaltasyna basqan
PETROPAVL. KAZINFORM – Soltústik Qazaqstan oblysynyń krımınaldyq polıtseıleri aýyl turǵyndaryn iri kólemde shyǵynǵa batyryp, alaıaqtyq jasady degen kúdikpen 30 jastaǵy er adamdy ustady.
SQO polıtsııa departamenti baspasóz qyzmetiniń málimetinshe, Taıynsha aýdanynyń turǵyny alaıaqtyqtyń 16 epızody boıynsha kúdikti dep tanylǵan. Buryn sottalmaǵan er adam aýyldastarynan alaıaqtyq jolmen úlken somadaǵy aqshany ıemdengen. Jalpy shyǵyn mólsheri 140 mln teńgege jýyq.
Polıtsııaǵa Taıynsha aýdanynyń turǵyndary aryzdanǵan. Aıtýlarynsha, olardyń ortaq tanysy 2022 jyldyń jazynan 2024 jyldyń mamyryna deıingi aralyqta nesıege aqsha aldyryp, ony aldap ıemdengen. Kúdikti barlyq jaǵdaıda tanystaryna ózin aýyl sharýashylyǵy salasynda iri bıznesi bar ekenin aıtyp, ár túrli syltaýlarmen onyń damýyna nesıe alyp berýdi suraǵan. Adamdar onyń aıtqanyna senip, bankterdiń mobıldi qosymshalary arqyly nesıe alyp bergen, keıin sol aqshany kúdikti kórsetken shotqa aýdarǵan. Biraq ýaqyt óte kele er adam aqshany qaıtarmaǵan.
«Krımınaldyq polıtsııa basqarmasynyń qyzmetkerleri aýdandyq polıtsııa bólimindegi áriptesterimen birlesip, jedel-izdestirý is-sharalaryn júrgizdi. Nátıjesinde alaıaqtyq jasady degen kúdikpen er adam ustalyp, qamaýǵa alyndy. Qazirgi ýaqytta alaıaqtyq faktileri boıynsha sotqa deıingi tergeý júrip jatyr. Bul kúdiktiniń alaıaqtyqtyń basqa uqsas epızodtaryna qatysy bar bolýy múmkin», - deıdi krımınaldyq polıtsııa basqarmasy bastyǵynyń mindetin atqarýshy Madııar Harıpov.
Buǵan deıin SQO-da astyq qabyldaý oryndary oraq naýqanyna daıyndalyp jatqanyn jazǵan edik.
