SQO-da epıdmaýsymda 64,5 myń adam JRVI-men aýyrdy

PETROPAVL. KAZINFORM — Soltústik Qazaqstan oblysynda osy epıdemııalyq maýsymda jiti respıratorlyq vırýstyq ınfektsııany juqtyrǵandar sany ótken kezeńmen salystyrǵanda 8,8% tómen. 

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, byltyr 71 myńǵa jýyq adam aýyrǵan.

JRVI-di juqtyrǵandardyń shamamen 64% — 14 jasqa deıingi balalar.

Sońǵy aptada oblys boıynsha 1,7 myń adam sýyq tıip aýyrǵan. Bul aldyńǵy aptamen salystyrǵanda 28% tómen. Buǵan deıin bir apta ishinde 2,4 myń jaǵdaı tirkelgen edi.

— 2025–2026 jylǵy epıdemııalyq maýsymda óńirde A (H3N2) tumaýyn 221 adam juqtyrdy. Jas ereksheligi boıynsha alǵanda, tumaýdyń 89 jaǵdaıy 14 jasqa deıingi balalar arasynda, al 132 jaǵdaı eresekter arasynda tirkelgen.

Sonymen qatar oblysta tumaýǵa jatpaıtyn vırýstardyń 82 jaǵdaıy anyqtaldy. Onyń ishinde 47 jaǵdaı — rınovırýstar, 10 — bokavırýstar, 4 — adenovırýstar jáne 21 jaǵdaı respıratorlyq-sıntsıtıaldy vırýs, — deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.

Mamannyń aıtýynsha, JRVI men tumaýdyń negizgi belgilerine joǵary temperatýra, jalpy álsizdik, tamaqtyń aýyrýy jáne murynnyń bitelýi jatady.

Dárigerler JRVI men tumaýdyń aldyn alý úshin bólmeni jıi jeldetip, qoldy muqııat jýyp, antıseptık quraldaryn qoldanýǵa keńes beredi. Sondaı-aq aýrý órshigen kezeńde adamdar kóp jınalatyn oryndarǵa barmaýdy nemese betperde taǵýdy eskertedi. Immýnıtetti nyǵaıtý úshin durys tamaqtanyp, jetkilikti uıyqtap, sportpen shuǵyldanǵan jón.

Buǵan deıin Shyǵys Qazaqstan oblysynda osy jyldyń basynan beri 48 636 JRVI-ge shaldyqqanyn jazǵan edik.