SQO-da epıdahýaldyń nasharlaýyna baılanysty óńir basshysy turǵyndarǵa úndeý jasady
SQO ákimdiginiń otyrysynda óńir basshysy Qumar Aqsaqalov turǵyndardy vaktsına alýǵa shaqyrdy. Óıtkeni emdeý mekemelerine túsip jatqan syrqatardyń barlyǵy – ekpe almaǵandar. Oblys boıynsha áli 120 myń adam ekpe alýy tıis.
«Keıbireýler áli kúnge deıin vırýsqa kúmánmen qaraıdy. Tek jaqyndarynan aıyrylǵannan keıin óz oılaryn ózgertip jatady. Áli vaktsına almaǵan 120 myń adamnyń arasynda sanaly jáne jaýapty adamdar kóp bolady dep oılaımyn. Men koronavırýsqa qarsy ekpe aldym, otbasym da tolyq kýrsynan ótti. Bul qaýipsiz jáne tıimdi. Meniń osy sózimdi 250 myń soltústikqazaqstandyq ta rastaıdy.
Jyl basynda sozylmaly aýrýlary bar turǵyndar qarsy kórsetilimderge baılanysty vaktsına almady. Qazir mamandar onyń qaýipsizdigine kóz jetkizdi. Búgingi tańda zeınetkerlerdiń tek 21 %-ynda vaktsınatsııa pasporty bar. Juqpaly aýrýhanalarda syrqattardyń basym bóligi - qarttar. Balalar ata-analaryna qamqorlyq jasaýy kerek, olarǵa vaktsınatsııa týraly durys aqparat berý kerek», - deıdi Qumar Aqsaqalov.
Jeke uıymdarda da áli kúnge deıin vaktsınatsııalanbaǵan qyzmetkerler bar. Basshylar máseleni baqylaýǵa alýy tıis.
«Qazir bizdiń oblys «qyzyl» aımaqta. Eger aýrýdyń taralýy toqtamasa, onda biz qatań sharalarǵa oralýǵa májbúr bolamyz. Medıtsınalyq mekemeler kovıdtik gospıtaldarǵa qaıta jabdyqtalatyndyqtan, josparly gospıtalızatsııany toqtatýǵa týra keledi. Kásiporyndar qaıtadan karantınge jiberiledi, saýda nysandary óz jumysyn qaıta toqtatady. Bul ekonomıkaǵa áser etedi. Adamdar jumys pen kiristerin joǵaltady, salyq túsimderi azaıady. Bul oblys bıýdjetine keri áserin tıgizedi. Buǵan eshkim múddeli emes. Kovıdpen kúres - kúrdeli másele. Biz vaktsınatsııadan neǵurlym uıymshyldyqpen ótsek, osy qıyn kezeńnen tezirek shyǵa alamyz», - dedi oblys ákimi.
