SQO-da energetıkterdiń kinásinen eki adam zardap shekti
PETROPAVL. QazAqparat – Soltústik Qazaqstan oblysynda jeńil kólik energetıkterdiń jolda kerip qoıǵan symyna soǵylyp, júrgizýshi men jolaýshy jaraqat aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jol-kólik oqıǵasy Aıyrtaý aýdanynyń ortalyǵy Saýmalkólde bolǵan. IJ-21251 avtokóliginiń 55 jastaǵy júrgizýshisi joldaǵy elektr baǵanyna kerilgen symdy baıqamaı soǵylǵan. Saldarynan júrgizýshi de, onyń qasyndaǵy jolaýshysy da jaraqat aldy. Aýdandyq aýrýhanada qajetti medıtsınalyq kómek kórsetilgennen keıin olar úılerine jiberildi.
Polıtseılerdiń aıtýynsha, «Kókshetaý Energo» JShS qyzmetkerleri kóshede jumys istegen. Olar symdy jolda kergenimen, jumys júrip jatqandyǵy jóninde eskertý belgisin qoımaǵan.
Erejeni saqtamaǵan jaýapty qyzmetkerge ákimshilik hattama toltyryldy.
