SQO-da eńbek zańnamasyn buzǵan zańdy tulǵalarǵa 11,3 mln teńgeden astam aıyppul salyndy
PETROPAVL. KAZINFORM - Soltústik Qazaqstan oblysynda qazirgi ýaqytta eńbekaqyny ýaqtyly tólemeý faktileri resmı tirkelmegen.
Bul týraly Memlekettik eńbek ınspektsııasy komıtetiniń SQO boıynsha departamenti habarlady.
Vedomstvonyń málimetinshe, jyl basynan beri eńbek ınspektsııasyna eńbekaqynyń merziminde tólenbeýine baılanysty 111 shaǵym túsken. Memlekettik eńbek ınspektorlary anyqtalǵan zań buzýshylyqtardy joıý týraly jumys berýshilerge 96 nusqama berip, olardyń tolyq oryndalýyn qamtamasyz etken. Al eńbek zańnamasyn buzǵany úshin 79 laýazymdy jáne zańdy tulǵa ákimshilik jaýapkershilikke tartylyp, jalpy somasy 11,35 mln teńgeden astam aıyppul salynǵan.
- Tórt kásiporynǵa qatysty materıaldar sot oryndaýshylaryna májbúrlep oryndatý úshin joldandy. Olar - «SCK» JShS, «Astek-Auto» JShS-niń Petropavl qalasyndaǵy ókildigi, «YA Media Group» JShS jáne «Astek-Auto» JShS. Buǵan eńbek ınspektorlarynyń nusqamalaryn oryndamaýy jáne ákimshilik aıyppuldardy ýaqytyly tólemeýi sebep boldy, - deıdi departament basshysy Mıras Sabaǵanov.
Byltyr memlekettik eńbek ınspektorlary jeke jáne zańdy tulǵalardan túsken 1 245 ótinishti qarap, 224 tekserý júrgizgen. Nátıjesinde eńbek zańnamasyn buzýdyń 464 deregi anyqtalǵan. Onyń 251-i áleýmettik-eńbek qatynastaryna, al 213-i eńbek qaýipsizdigi men eńbekti qorǵaý talaptaryna qatysty bolǵan.
Tekserý qorytyndysy boıynsha jumys berýshilerge 131 nusqama berilip, 72 laýazymdy jáne zańdy tulǵaǵa jalpy somasy 11,4 mln teńge kóleminde ákimshilik aıyppul salynǵan. Qabyldanǵan sharalardyń nátıjesinde 103 qyzmetkerdiń eńbek quqyǵy qorǵalyp, olar jalpy somasy 17 mln teńge eńbekaqysyn aldy.
- Óńirde qurylyspen aınalysqan «Qazgradstroı NS» JShS ońaltý satysynda tur. Kásiporynnyń eki qyzmetkerge eńbekaqy bereshegi 3,7 mln teńge shamasynda. Kompanııa dırektorynyń qaıtys bolýyna baılanysty bankrottyq rásimin bastaý ázirge múmkin bolmaı otyr. Muragerlik rásimderi aıaqtalǵannan keıin kásiporyndy bankrot dep taný boıynsha tıisti sharalar qabyldanady, - deıdi Mıras Sabaǵanov.
Departamenttiń málimetinshe, qazirgi ýaqytta SQO-da narazylyq aktsııalary men eńbek janjaldary tirkelmegen. Jalpy áleýmettik-eńbek qatynastary salasyndaǵy ahýal turaqty dep baǵalanǵan.
Al eńbekaqysy ýaqytynda tólenbegen jaǵdaıda qyzmetkerler eńbek ınspektsııasyna júgine alady. Mamandardyń aıtýynsha, azamattar Memlekettik eńbek ınspektsııasy komıtetiniń SQO boıynsha departamentine jeke qabyldaýǵa jazylyp, memlekettik eńbek ınspektorlarynan keńes ala alady. Sondaı-aq ótinishti «e-Otinish» biryńǵaı platformasy arqyly onlaın joldaýǵa múmkindik bar.
Eńbek zańnamasyna sáıkes, jumys berýshiniń eńbekaqyny ýaqytynda tólemeýi ákimshilik jaýapkershilikke ákep soǵady. Mundaı jaǵdaıda memlekettik eńbek ınspektorlary tekserý júrgizip, zań buzýshylyqtardy joıý týraly nusqama beredi. Nusqama oryndalmaǵan jaǵdaıda kináli tulǵalarǵa aıyppul salynyp, materıaldar májbúrlep oryndatý úshin sot oryndaýshylaryna joldanýy múmkin.
Buǵan deıin Astanada eńbek zańnamasyn buzǵan 96 jumys berýshige 18 mln teńge aıyppul salynǵanyn jazǵan edik.
