SQO-da eńbek táýekelderiniń tsıfrlyq kartasyna 30 shaqty kásiporyn engen
PETROPAVL. KAZINFORM — Soltústik Qazaqstan oblysynda eńbek qatynastary salasynda táýekel deńgeıi joǵary 28 kásiporyn esepke alynǵan.
Eńbek ınspektsııasy komıtetiniń SQO boıynsha departamentiniń málimetinshe, elimizde eńbek qaýipsizdigin arttyrý jáne kásiporyndardaǵy yqtımal eńbek táýekelderiniń aldyn alý maqsatynda 2024 jyly «Eńbek táýekelderiniń tsıfrlyq kartasy» aqparattyq júıesin iske qosyldy. Bul júıe eńbek qatynastary salasyndaǵy máselelerdi erte anyqtaýǵa jáne problemalardyń aldyn alýǵa múmkindik beredi.
SQO boıynsha bul kartaǵa 28 kásiporyn engen.
— Táýekel kartasynda kórsetiletin negizgi máselelerge toqtalsaq, kásiporyndarda qyzmetkerlerdi saqtandyrý shartynyń bolmaýy, tirkelgen eńbek sharttary men mindetti zeınetaqy jarnalary aýdarymdary arasyndaǵy sáıkessizdik, kadrlar turaqsyzdyǵy, sondaı-aq áleýmettik aýdarymdar boıynsha bereshektiń bolýy. Oblys kásiporyndaryndaǵy táýekeldi jaǵdaılardyń aldyn alý maqsatynda byltyr úshjaqty komıssııalardyń 122 otyrysy ótkizildi. Komıssııa otyrystarynda jekelegen eńbek ujymdaryndaǵy áleýmettik-eńbek qatynastarynyń jaı-kúıi talqylanyp, jalaqy men áleýmettik aýdarymdar boıynsha bereshekti boldyrmaý, sondaı-aq jumystan bosatylatyn qyzmetkerlerge qatysty qajetti áleýmettik jáne quqyqtyq sharalardy qabyldaý máseleleri qaraldy, — deıdi departament basshysynyń mindetin atqarýshy Azat Kósherbaev.
Sondaı-aq, memlekettik eńbek ınspektorlary byltyr qyzmetkerlerdi eńbek shartyn jasaspaı jumysqa tartýdyń úsh faktisin anyqtady. Barlyq jumys berýshilerge tıisti nusqamalar berilip, olar jalpy somasy 472 myń teńge aıyppul túrindegi ákimshilik jaýapkershilikke tartyldy.
Mamandardyń aıtýynsha, byltyr SQO-da narazylyq aktsııalary men eńbek janjaldary tirkelmegen. Jalpy alǵanda, óńirdegi áleýmettik-eńbek qatynastary salasyndaǵy jaǵdaı turaqty.
Buǵan deıin eńbek shartyn onlaın rásimdeýge bolatyndyǵyn jazǵan edik.