SQO-da eńbek sharttaryn talapqa saı rásimdemegen 19 laýazym ıesi jaýapqa tartyldy

PETROPAVL. KAZINFORM - Soltústik Qazaqstan oblysynyń mamandandyrylǵan tabıǵat qorǵaý prokýratýrasy orman sharýashylyǵy mekemelerinde eńbek zańnamasynyń saqtalýyn taldaý barysynda zańnamanyń birqatar buzýshylyqtaryn anyqtady.

Oblys prokýratýrasy baspasóz qyzmetiniń habarlaýynsha, Orman sharýashylyǵynyń basshylary 33 qyzmetkermen jasalǵan eńbek sharttary týraly mindetti málimetterdi eńbek sharttaryn esepke alýdyń biryńǵaı júıesine engizbegen, bul Qazaqstan Respýblıkasy Eńbek kodeksiniń talaptaryna qaıshy jáne azamattardyń eńbek qatynastaryn tıisinshe resimdeý, eńbek ótilin rastaý quqyǵyn shektegen.

Sonymen qatar, jumys ýaqytyn esepke alý tártibinde buzýshylyqtar anyqtaldy, sonyń nátıjesinde jekelegen qyzmetkerlerge olardyń jumys ornynda naqty bolmaǵan kezeńderi, onyń ishinde Qazaqstan Respýblıkasynan tys jerlerde bolǵan kúnderi úshin jalaqy eseptelip, tólengen.

Qabyldanǵan sharalardyń arqasynda 33 qyzmetkerdiń quqyǵy qalpyna keltirildi-eńbek sharttary týraly málimetter EShEABJ-ne tolyq kólemde engizildi, azamattardyń ózderiniń eńbek qyzmeti týraly aqparatqa qoljetimdiligi qamtamasyz etildi.

Negizsiz tólengen jalaqy somasy bıýdjetke óteldi, 19 laýazymdy tulǵa tártiptik jaýapqa tartyldy.

-Azamattardyń eńbek quqyqtarynyń saqtalýy, sondaı-aq bıýdjet qarajatyn paıdalanýdyń zańdylyǵy prokýratýra organdarynyń turaqty baqylaýynda, - delingen Soltústik Qazaqstan oblysynyń prokýratýrasy taratqan aqparatta.

Osyǵan deıin elimizde eńbek sharty onlaın jasalyp, jeke isi tsıfrlyq formatqa aýysatyny týraly jazdyq.