SQO-da eń joǵary ball alǵan túlek fızıka-matematıka pániniń muǵalimi bolǵysy keledi
PETROPAVL. QazAqparat – Soltústik Qazaqstan oblysynda Ulttyq biryńǵaı test tapsyrýǵa nıet bildirgenderdiń 62,9% búginge deıin qatysyp, 124 túlek 100 jáne odan da joǵary ball aldy, dep habarlaıdy QazAqparat tilshisi.
SQO Bilim basqarmasynyń málimetinshe, UBT-ǵa kelgen 4 túlek dene qyzýynyń kóterilýine baılanysty testileýge jiberilmedi. Olardyń bireýi 27 maýsym kúni synaqtan ótse, qalǵan úsheýi erteń testileýden ótpek.
UBT barysynda 7 túlektiń test nátıjesi joıyldy. Endi olardyń tórteýi qańtarda alǵan sertıfıkatpen joǵary oqý ornyna túspek, ekeýi tamyzda testileýden ótedi. Al bireýi kolledjge barýǵa sheshim qabyldady.
21 maýsymnan bastap osy kúnge deıin 124 abıtýrıent 100 jáne odan da joǵary ball jınady. Olardyń 42-si aýyl mektepteriniń, 45-i mamandandyrylǵan mektepterdiń túlekteri.
Eń joǵary – 128 ball alǵan boıjetken – Tımırıazev aýdanyndaǵy Mıchýrıno orta mektebiniń túlegi Daıana Vasılıýk. Daıana «Altyn belgi» ıegeri. Fızıka jáne matematıka pánderiniń muǵalimi bolýdy armandaıdy, sol úshin M.Qozybaev atyndaǵy SQMÝ-ge oqýǵa túspek. Túrli pándik baıqaýlar men olımpıadalarǵa qatysqan ol sportpen de shuǵyldanady. Sportta shańǵy men jeńil atletıkaǵa basymdyq bergen.
Joǵary 126 ball alǵan ekinshi túlek te Tımırıazev aýdanynyki. Sábıt Muqanov atyndaǵy mektep-gımnazııany «Altyn belgige» támamdaǵan Jalǵas Muqalıev bilim ordasynda «Adal urpaq» klýbyn basqardy.
«Bolashaǵymdy aqparattyq tehnologııalarmen baılanystyrǵym keledi. Informatıkadan óz baǵdarlamalarymdy jazyp júrmin. Súıikti pánderim – fızıka men matematıka. Fızıkadan kóptegen olımpıadalarda jeńiske jettim. Sankt-Peterbor ýnıversıteti uıymdastyrǵan halyqaralyq olımpıadanyń júldegerimin. Bos ýaqytymda shahmat oınaǵandy jaqsy kóremin. Shahmattan oblystyq olımpıadanyń jeńimpazymyn», - deıdi Jalǵas Muqalıev.
Jalpy SQO-da búginge deıin 2 myńnan astam adam testileýden ótse, sonyń 200-i qajetti 50 balldy jınaı almady.
Aqerke Dáýrenbekqyzy
